Бөтендөнья Җир көненә багышланган экологик акция

20 апрель көнне шәһәр мәдәният йортының иҗат хезмәткәрләре Бөтендөнья Җир көненә багышланган «Планетаны бергә бизик» дигән экологик акция оештырдылар. Максаты: катнашучыларны бәйрәм белән таныштыру, экологик аң һәм җир планетасына сак караш формалаштыру. Акция башында катнашучыларны 22 апрельдә Җир көнен билгеләп үтү кабул ителүе белән таныштырдылар, һәм һәр кеше планетабызны сакларга үз өлешен кертергә тиешлеген аңлаттылар. Барыннан да элек, кешеләрнең әйләнә-тирә дөньяга мөнәсәбәтен үзгәртергә кирәк. Урманда, паркларда, табигатьтә үз-үзеңне тоту кагыйдәләрен искә төшерделәр: чүпләмәскә, агач ботакларын сындырмаска, яфракларны һәм чәчәкләрне өзмәскә, кошларга зыян китермәскә, кыскасы, һәр кешенең үз-үзен тотышының мөһим әһәмияте турында сөйләштеләр. Соңыннан барысы да шәһәр мәдәният йорты янындагы территорияне узган елгы яфраклардан һәм чүп-чардан чистартуга керештеләр. Уртак көч белән чисталык һәм тәртип урнаштырдылар. Бу мөһим көнгә һәркем үзе яшәгән урында үз өлешен кертә ала.