Туган якны өйрәнү музее хезмәткәрләре сугыш ветераны янына бардылар

Курск сугышы Бөек Ватан сугышының төп бәрелешләренең берсе. Хәрби операцияләр 1943 елның 5 июленнән 23 августына кадәр дәвам итә. Курск дугасында совет гаскәрләренең немец-фашист илбасарларына каршы берьюлы оборона һәм һөҗүм операцияләре оештырыла. Операциянең максаты - вермахт көчләренең зур һөҗүмен туктату һәм аның стратегик төркемен тар-мар итү. 19 август көнне музей хезмәткәрләре Бөек Ватан сугышы ветераны Валентина Лукьяновна Лыкова янына бардылар. Ул 1923 елның 11 июлендә Курск өлкәсенең Түбән Еремино авылында крестьян гаиләсендә туа. Валентина Лукьяновна Үзәк, аннан 2 нче Белоруссия фронты составында Курск сугышында катнашкан, кече Ватанын яклаган, икенче дәрәҗә Ватан сугышы ордены белән бүләкләнгән. Ул бөтен Украинаны, Белоруссияне узган, Польшага кадәр барып җиткән. Сугыш тәмамланганга дистә еллар үтсә дә, аның хәтерендә әлегә кадәр бу вакыйга хатирәләре яхшы сакланган. Валентина Лукьяновна фронтта шәфкать туташы булып хезмәт итә, сөенечкә сугышта аңа исән калырга һәм өенә кайтырга насыйп була. Көн саен яу кырларында үзен аямый яралыларны коткара. Үзе дә җиңел яралана, бераз тернәкләнеп, яңадан алгы сызыкка кайта. Ветеранга 98 яшь, әмма шуңа да карамастан, ул һаман тормыш сөючән һәм көчле рухлы булып кала бирә.