Зәйдә чираттагы эшсезләр төркеме укуга кереште

Зәй халыкны эш белән тәэмин итү үзәге юлламасы буенча эшсез гражданнар арасыннан ике кеше «Чәчтараш» һөнәре буенча беренче дәресләргә кереште. Әлеге курс буенча укулар 2 ай дәвам итәчәк. Соңыннан квалификация имтиханы нәтиҗәләре буенча билгеләнгән үрнәктәге документ биреләчәк. Дәресләрне парикмахер хезмәтләре өлкәсендә практик эш һәм заманча технологияләр белү буенча зур тәҗрибәгә ия югары квалификацияле педагог-парикмахер үткәрә. Чәчтараш сәнгате бер урында гына тормый, даими рәвештә яңа методикалар, технологияләр, хезмәт күрсәтүләр барлыкка килә, һәрвакыт яңа белем үзләштерү һәм өстәмә белем алу мөмкинлеге бар. Чәчтараш — сирәк иҗади һөнәрләрнең берсе, ул яхшы акча эшләргә мөмкинлек бирә. Аны уңайлы графигы, кешеләр белән аралашу мөмкинлеге, үзеңә эшләү һәм түбән салымнар өчен сайлыйлар, бигрәк тә үзмәшгуль булып теркәлгән очракта отышлы. Бүгенге көндә кирәкле һөнәр, һәм якын киләчәктә хәл үзгәрмәячәк, димәк, һәрвакыт эш табу мөмкинлеге бар.