Зәй районы Сәвәләй авылында яңа чиркәү ачылды

Бүген Сәвәләй авылында район башлыгы Разиф Кәримов катнашында чиркәү ачу тантанасы булды. Чиркәү шушы авылда туып-үскән, танылган җырчы һәм композитор, Татарстан Республикасының халык артисты Виталий Агапов инициативасы белән төзелгән. Ул шулай ук гыйбадәтханә төзүнең баш меценаты да булды. Сәвәләйләр, якташлары башлангычын хуплап, аның хыялын тормышка ашыруга зур өлеш керттеләр, акчалата да булыштылар, өмәләрдә актив катнаштылар. Әлеге мөһим вакыйга белән авыл халкын район башлыгы Разиф Кәримов котлады. Ул Виталий Васильевичка һәм авыл халкына изге эшләре, бердәмлекләре өчен рәхмәт белдерде, яңа гыйбадәтханәнең озак еллар хезмәт итүен теләде. Әлмәт һәм Бөгелмә епискобы Мефодий гыйбадәтханәне изгеләндерү чинын үткәрде. Тәре йөрешеннән соң Владыка мәхәллә кешеләренә котлау сүзләре белән мөрәҗәгать итте һәм храмга кеше йөрүдән туктамасын, ул озак еллар дин тотучыларга хезмәт итсен һәм яшьләргә дини тәрбия бирү үзәгенә әйләнсен,- дигән теләкләрен җиткерде. Иң актив, инициативалы гаиләләр Зәй муниципаль районы Башлыгының Рәхмәт хатлары белән бүләкләнделәр. Алар-Слепцовлар, Романов, Московлар, Фирсовлар, Троян, Сабаев, Смирнов, Белышева һәм башкалар. Бүген яңа гыйбадәтханәдә беренче илаһи литургия уздырылды.