Район башлыгы бөртеклеләрне урып-җыю барышы белән танышты

Бүген район башлыгы Разиф Кәримов авыл хуҗалыгы һәм азык-төлек идарәсе башлыгы һәм белгечләре белән берлектә бөртекле культураларны урып-җыюның барышы белән танышты. Бүгенге көндә «Агрокөч» АҖнең барлык комбайннары көзге бодай һәм борчак җыюга керештеләр. Бер көнгә 1000 гектарга якын суктырыла. Шушы көннәрдә крестьян-фермер хуҗалыклары да урып-җыюга керешәчәкләр. Зәй районы кырларында бөртекле культураларны җыю буенча механикалаштырылган 8 звено эшли, барлыгы 60 комбайн җәлеп ителәчәк. Һәр отряд су ташу машиналары һәм трактор, гадәттән тыш хәлләрдә файдалану өчен туфрак эшкәртү агрегаты белән комплектланган. Эш югары дәрәҗәдә оештырылган. Район башлыгы урып-җыюның сыйфатына, технологик таләпләрнең үтәлешенә, техника куркынычсызлыгы һәм хезмәтне саклау мәсьәләләренә аерым игътибар бирде. Комбайнчылар белән әңгәмә вакытында Разиф Галиевич алар алдында торган бурычларны әйтеп үтте, матди кызыксындыру чаралары белән таныштырды. Төп таләп- корылык шартларында үстерелгән уңышны кыска вакыт эчендә, югалтуларсыз җыеп алу. Бүгенге көнгә 1300 гектар мәйдан суктырылган. Уңыш гектарыннан 28,1 центнер тәшкил итә.