Зәйдә район һәм шәһәр Советлары берләштерелгән утырышы узды

Бүген «Энергетик» мәдәният сараенда РФ Дәүләт Думасының җиденче чакырылыш депутаты Олег Морозов катнашында Зәй муниципаль районы һәм Зәй шәһәре Советларының уртак утырышы узды. Утырышның көн тәртибенә 14 мәсьәлә кертелгән иде. Депутатлар Советларның аерым карарларына үзгәрешләр кертү турындагы мәсьәләләрне карадылар, Россия Эчке эшләр министрлыгы Зәй районы буенча бүлегенең экстремистлык күренешләрен кисәтү һәм булдырмау эшчәнлеге, законсыз миграциягә һәм радикаль идеологиягә каршы торуга, милләтара конфликтларны, этник һәм дини экстремизмны кисәтүгә, чит ил гражданнары һәм гражданлыгы булмаган затлар кылган хокук бозуларны киметү, миграцион законнарны үтәүгә юнәлтелгән нәтиҗәле чаралар эшләү; Зәй муниципаль районы Советының бюджет-финанс мәсьәләләре, икътисадый үсеш һәм муниципаль милек буенча даими комиссиясе рәисен сайлау турында һәм башка мәсьәләләр буенча фикер алыштылар. Катнашучылар алдында финанс-бюджет палатасы рәисе Павел Байрашев, Россия Эчке эшләр министрлыгының Зәй районы буенча бүлеге башлыгы вазыйфаларын вакытлыча башкаручы Алексей Бортников, район Советының юридик бүлеге башлыгы Владимир Кудряшов, район Башкарма комитеты җитәкчесенең икътисади үсеш буенча урынбасары Розалия Архипова, Советның Гомуми бүлек кадрлар секторы мөдире Марина Сергеева чыгыш ясадылар. Олег Морозов 9 ай эчендә үзенең депутат эшчәнлеге турында хисап тотты. Ул зәйлеләрне эшнең төп юнәлешләре белән таныштырды, илнең икътисади һәм сәяси торышына бәя бирде, планнары белән уртаклашты, сорауларга җавап бирде. Утырышка район башлыгы Разиф Кәримов йомгак ясады.