Зәйдә татар халкының милли бәйрәме- Сабантуй узды
Бүген Ринат Фәрдиев исемендәге паркта Зәй Сабантуе узды. Парк территориясендә төрле халыкларның ишегаллары тәкъдим ителде. Бәйрәм кунаклары өй интерьерлары һәм татар, рус, керәшен, чуаш халыкларының тормыш рәвеше белән таныштылар. Бәйрәм чарасы Сабантуй тарихына, туган җирдә яшәүче халыкларның дуслыгына, аларның хезмәт сөючәнлегенә, гореф-гадәтләренә багышланган театральләштерелгән тамаша белән башланып китте. Зәй районы башлыгы Разиф Кәримов, районның икътисади казанышларында авыл хуҗалыгы һәм башка тармак хезмәткәрләренең казанышларын билгеләп, җыелучыларны бәйрәм белән котлады. Татарстан Республикасы Президенты исеменнән зәйлеләрне Сабантуй белән республика Хөкүмәте кураторы, мәдәни мирас объектларын саклау буенча ТР Комитеты рәисе Иван Гущин котлады. Сабантуйның хөрмәтле кунаклары-Хатыйп Миңнегулов, Искәндәр Гыйләҗев, Нәкыя Гыйләҗева, Геннадий Максимов, Юрий Гортышов, Татарстан Республикасы Дәүләт Советы депутатлары Николай Нефедов, Илшат Әминов һәм Татарстанның гына түгел, Россиянең спорт җәмәгатьчелеге вәкилләре иде. Авыл хуҗалыгы алдынгылары парады булды. 100 кеше мактаулы даирәгә ия булды, 185 механизатор һәм терлекче акчалата премияләр белән бүләкләнде. Язгы кыр эшләре йомгаклары буенча районның иң яхшы хуҗалыкларын бүләкләү дә узды. «Зәй шикәре» агрофирмасының "Сәвәләй" җитештерү комплексы механизаторы Михаил Никандров 3 467 гектар сабан культуралары чәчкән, язгы кыр эшләрендә 103 смена эшләгән. Тырыш хезмәте өчен район башлыгы Разиф Кәримов аңа «Лада-грант» җиңел автомобиле ачкычы тапшырды, шулай ук чәчү батыры традицион тәкә белән бүләкләнде, аңа Сабантуй әләмен күтәрү хокукы бирелде. Төп сәхнәдә «Сабантуй гүзәле-2021» бәйгесе узды. Сайлап алу турын узган районның 9 гүзәле үз-үзләрен күрсәтә белүдә көч сынашты. Сабантуй гүзәлләре итеп Имәнлебаш авылыннан Ләйсән Әхмәтҗанова һәм Зәйдән Ангелина Кузьмина танылды. Спорт мәйданчыгында көн дәвамында милли көрәш, гер спорты, авыр атлетика һәм башка спорт төрләре буенча ярышлар, балалар мәйданчыгында - балалар Сабантуе, «милли уеннар» мәйданчыгында халык уеннарында катнашучылар күп булды. Сабантуйның абсолют батыры булып Чыбыклыдан Руслан Хәмидуллин калды. "Мирас", "Азаль», «Мириданс» халык вокаль-хореографик ансамбле, татар эстрадасы артистлары Равилә һәм Радик Шәрибҗановлар, «Бәллүр» вокал төркеме, Марат Галимов, Айдар Сөләйманов Сабантуй кунакларына үзләренең иң яхшы концерт номерларын бүләк иттеләр. Быел Зәй Сабан туе дәүләтебезнең төп бәйрәмнәреннән берсе-Россия көне белән туры килде. Сабантуй программасын Россия көненә багышланган концерт программасы дәвам итте.