Зәйдә өлкән яшьтәге авыл халкы арасында коронавирустан вакцинация ясау мәсьәләләре буенча аңлату эшләре алып барыла

“Демография” илкүләм проектының “Өлкән буын” проекты кысаларында көн саен авыл җирендә яшәүче 65 яшьтән өлкәнрәк гражданнарны федераль программа буенча алынган махсус автомобиль белән диспансерлаштыру узу өчен Зәй үзәк район хастаханәсенә алып килү дәвам итә. Өлкәннәрне график нигезендә алып киләләр, бу эшне “Шатлык” халыкка социаль хезмәт күрсәтү комплекслы үзәге, Зәй үзәк район хастаханәсе һәм авыл җирлекләрендә җирле үзидарә органнары ведомствоара тыгыз хезмәттәшлектә алып баралар. Нәкъ менә шундый тандемда эшләү өлкән яшьтәге авыл кешеләренең җитди авыруларын иртә ачыклау һәм диагностикалауга юнәлдерелгән диспансерлаштыру белән колачларга мөмкинлек бирә. Май аеннан башлап, өлкәннәр белән эшләүдә яңалык булып, авыл пенсионерлары арасында яңа коронавирус инфекциясеннән вакцинациянең әһәмияте турында аңлату әңгәмәләре үткәрү торды. Диспансерлаштыруга килүче гражданнар COVID-19га каршы Россия вакциналарының төрләре, аларның өстенлекләре, үзенчәлекләре һәм чикләүләре турында тулы мәгълүматка ия белешмәлекләр ала. Өлкән яшьтәгеләр әлеге белешмәлекне үзләренә уңайлы вакытта, тыныч шартларда өйрәнеп, үзләре өчен дөрес карар кабул итү мөмкинлегенә ия булалар.