Үзәк китапханәдә Җиңүне якынайткан хатын-кызларга багышланган әдәби-музыкаль композиция үткәрелде

Бөек Ватан сугышында Җиңүнең 76 еллыгы якынлаша. Сугыш вакыйгалары акрынлап үткәннәргә китә, тарих битенә әйләнә. С.Рафыйков исемендәге Үзәк китапханәдә Бөек Җиңү бәйрәме алдыннан ир-атлар белән беррәттән Җиңүне якынайткан хатын-кызларга багышланган әдәби-музыкаль композиция үткәрелде. Чара «Сугыш- хатын-кыз йөзе түгел...» республика социаль-гуманитар проекты кысаларында узды. Проектның оештыручысы-Татарстан Республикасы Дәүләт Советының «Мәрхәмәт-Милосердие» хатын-кыз депутатлар берләшмәсе. Чарага тыл хезмәтчәннәре – Мария Ефимовна Попова, Клавдия Петровна Кулеева, Рина Гатуповна Садретдинова чакырылган иде. Зәй шәһәре Советы депутаты Е.В. Недошивина, җирле иҗтимагый оешмалар вәкилләре, шәһәр халкы, китапханә укучылары да катнашты. Очрашуда катнашучылар Бөек Ватан сугышында һәлак булган барлык кешеләрне бер минут тынлык белән искә алдылар. «Энергетик» мәдәният сараеның иҗат коллективы чыгышы тулысынча ветераннарга багышланган иде. Китапханәдә шулай ук Зәй районы ветеран хатын – кызларының һәм тыл хезмәтчәннәренең фотокүргәзмәсе, китап – иллюстратив күргәзмә һәм «партизаннар привалы»инсталляциясе оештырылган иде.