Зәйдә тренер Илдус Сөнгәтуллин истәлегенә багышланган «Барс» спорт мәктәбе футбол буенча II ачык беренчелек үтте

27 апрельдән 4 майга кадәр Зәй шәһәренең «Энергия» стадионында 2006-2007 елгы һәм 2008 елгы яшүсмерләр командалары арасында футбол буенча тренер Сөнгәтуллин Илдус Каюм улы истәлегенә багышланган II ачык беренчелек үтте. Илдус Каюм улы районда физик культура һәм спортка нигез салучыларның берсе иде. Ул күп кенә спорт төрләрен үстерде. Үзе футбол, туплы хоккей, тимераякта шуу спорты, җиңел атлетика белән шөгыльләнгән. Төрле ярышларда җиңүче һәм призер булган. Аның җитәкчелегендә Зәйдә «Күн туп»турниры узды. Ул гомере буе спорт өлкәсендә эшләгән. Ярышларда 2008 елда туган яшүсмерләр командалары арасында җиңүчеләр һәм призерлар: 1 урын - 3 нче мәктәп, 2 урын-6 нчы мәктәп, 3 урын - 4 нче мәктәп; 2006-2007 елгы егетләр арасында 1 урын-6 нчы мәктәп, 2 урын - 7 нче мәктәп, 3 урын - 2 нче мәктәп. Бүләкләү тантанасында физик культура, спорт һәм туризм идарәсе башлыгы И.З. Ашрапов, «Барс» спорт мәктәбе директоры К. Х. Асадов, Илдус Сөнгатуллин гаиләсе: Надежда Михайловна һәм кызы Орнелла Илдус кызы катнаштылар. Илдус Каюм улы гаиләсе бүләк атрибутикасы кубоклар, статуэткалар һәм иң яхшы уенчылар өчен истәлекле бүләкләр алуда ярдәм итте. Ярышларны «Барс» спорт мәктәбе тренеры Р.Р. Бикмиев оештырды.