Зәйдә мөмкинлекләре чикле балалар өчен “Развивайка” клубы эшен дәвам итә

Зәй районы “Радость” халыкка социаль хезмәт күрсәтү комплекслы үзәге базасында мөмкинлекләре чикле балалар тәрбияләүче гаиләләр өчен “Развивайка” клуб эшчәнлеге кысаларында социаль технология гамәлгә ашырыла. 27 апрельдә үзәк психологы клубта 2 өлешкә бүленгән төркемле дәрес үткәрде. Беренче өлеш Европа иммунизация атналыгына, икенчесе - Пасха бәйрәме традицияләренә багышланган иде. Дәрестә балалар һәм өлкәннәр микроблар, профилактика һәм вакцинация чаралары белән таныштылар. Уен формасында шәхси гигиена турында белемнәрен тикшерделәр, әлеге темага табышмаклар әйтештеләр, сәламәтлек кагыйдәләре белән таныштылар. Дәреснең икенче өлеше арттерапия ысулын кулланып, балаларны коллективка берләштерүгә, эмоциональ киеренкелекне бетерүгә, хәтер, игътибар, сөйләмне, моториканы үстерүгә, балалар-ата-аналар мөнәсәбәтләрен гармонияләштерүгә ярдәм итә торган психологик коррекция ысулы буларак үтте. Пластилин белән эшләүнең традицион булмаган техникасы -пластилинография ярдәмендә балалар “Пасха традицияләре” темасына иҗади эшләр башкардылар. Балалар үзләренең фантазияләрен, белемнәрен эшкә җигеп пластилин белән рәсем ясау ярдәмендә матур “пасха йомыркалары” ясадылар, аларны чәчәкләр, чебиләр һәм төрле бизәкләрләр белән бизәделәр. Үз куллары белән ясалган матур һәм гадәти булмаган иҗади эшләр килеп чыкты.