Зәй районында язгы кыр эшләрендә катнашачак техниканы кабул итү бара

Бүген район авыл хуҗалыгы формированиеләрендә иртәнге сәгать 7дән район башлыгы Разиф Кәримов җитәкчелегендәге язгы кыр эшләрендә катнашачак техниканы кабул итү буенча комиссиясе эше башланды. Район хуҗалыкларында авыл хуҗалыгы техникасын ремонтлау эше тулысынча төгәлләнде. Татарстан Республикасы Авыл хуҗалыгы һәм азык-төлек министрлыгы боерыгы нигезендә, агросәнәгать комплексы оешмаларын язгы кыр эшләренә вакытында әзерләүне тәэмин итү максатларында, районда ел саен Татарстан Республикасы Авыл хуҗалыгы һәм азык-төлек министрлыгы вәкилләре - "Агрокөч-сервис” АҖнең ремонт һәм эксплуатацияләү сыйфатын тикшерү бүлеге башлыгы Ф.С. Хәкимова, «Агрокөч» АҖ, Гостехнадзор, Россельхозцентр һәм районның авыл хуҗалыгы һәм азык-төлек идарәсе белгечләре катнашында конкурс үткәрелә. Комиссия үз эшен «Нива» ҖЧҖнән башлады. Көн дәвамында комиссия “Восток”, “Зәй шикәре”, “Зәй”агрофирмалары, “Союз-Агро” ҖЧҖ бүлекчәләрендә тракторларның һәм авыл хуҗалыгы машиналарының әзерлеген тикшерәчәк. График буенча 12 урында техника кабул ителәчәк. Барлык урыннарда да тракторлар тигез мәйданнарга тезеп куелган. Комиссия тракторларга техник күзәтү уздыру, күчмә ремонт звенолары булу, техник хезмәт күрсәтү пункты эше, хезмәтне саклау буенча расланган инструктажлар, кабинет һәм хезмәтне саклау документлары булу, барлык технологик процессларның үтәлеше, орлык материалының әзерлеге, чәчү өчен эшкәртелгән җирләрнең тирәнлеге, орлыкны күмдерү тирәнлеге, агрегатның тизлеге, чи калдырмый чәчү, игенчелек эше культурасын күтәрү кебек әзерлек дәрәҗәсен бәяләү күрсәткечләренә таяна. Шулай ук техника кабул итү барышында комиссия әгъзалары механизаторларга куркынычсызлык техникасын үтәү, хезмәтне бәяләү, язгы кыр эшләрендә катнашучы хезмәткәрләрне матди кызыксындыру буенча аңлатмалар бирәләр. Районда быелгы язгы кыр эшләрен үткәрүгә төрле маркадагы 300 трактор әзерләнгән, аларның 60ы – аеруча көчле. Язгы кыр эшләрен уңышлы башкарып чыгу өчен районга ташламалы бәядән 1815 тонна дизель ягулыгы (1 га 20 кг исәбеннән) бирелде.