Зәйдә чираттагы авыл хуҗалыгы ярминкәсе узды

Бүген «Энергетик» мәдәният йорты каршындагы үзәк мәйданда чираттагы, сезон башыннан тугызынчы ярминкә узды. Иртәнге сәгать 7дән биредә халык күп иде инде. Беренчеләрдән булып сәүдә рәтләре буйлап район башлыгы Разиф Кәримов узды һәм шәһәр халкына тәкъдим ителүче продукциянең ассортиментын һәм сыйфатын бәяләде. Ярминкәдә Бигеш, Кадер, Дүрт мунча һәм Югары Пәнәче авыл җирлекләре шәхси ярдәмче хуҗалыклары, шулай ук фермерлар: Карташов, Ионов, Савгильдин, Рафаиловлар, Носовлар актив катнашты. Традиция буенча, ярминкәдә сыер, дуңгыз ите, кош ите, ит ярымфабрикатлары, казылык һәм кондитер әйберләре, сөт продукциясе, яшелчә, шикәр комы сатылды. Шунысы игътибарга лаек, ярминкәдә өлкән яшьтәге зәйлеләргә сатып алган әйберләрен автомашиналарга, автобус тукталышына, кайберләренә хәтта өйгә кадәр илтеп куярга ярдәм итүче волонтерлар эшли. Сезон башыннан алып тугыз ярминкәгә 4 млн. сумнан артык товар сатылган.