Зәйдә "Зәй ГРЭСы пар-газ җайланмасы" проекты буенча җәмәгать тыңлаулары узды

Тыңлауларда катнашучылар Зәй ГРЭСының өстәмә энергоблогы төзелешен, 50 елдан артык тарихы булган легендар электростанцияне модернизацияләүне хупладылар. Утырышны шәһәр хакимиятенең кече залында район башкарма комитеты җитәкчесенең инфраструктура үсеше буенча урынбасары Николай Нифатов үткәрде. «Землеустроительное бюро» ҖЧҖ директоры Рәсил Әгъләмов тыңлауларда катнашучыларга капиталь төзелеш объекты өчен линия объектларын планлаштыру проекты һәм урнаштыру проектын тәкъдим итте. Эшләрнең заказчысы - «ТАТЭНЕРГО» АҖ филиалы-Зәй ГРЭСЫ. Генплан нигезендә линияле объектлар: газүткәргечләр, суүткәргечләр, парүткәргечләр, электр коммуникацияләре төзү карала. Торбаүткәргечләр эстакадасы бары тик Зәй ГРЭСына бүлеп бирелгән җирләрдә генә урнаша. Суыткыч суның циркуляция сулары, кабельле электр линияләре өлешчә муниципаль милек җирләрендә урнашкан. Тыңлауларда катнашучылар «Татэнерго” АҖ филиалы Зәй ГРЭСы тарафыннан пар-газ җайланмасы» капиталь төзелеш объекты өчен линия объектларын урнаштыру территориясен планлаштыру проектын һәм территорияне межалау проектын бертавыштан расладылар.