Зәй студентлары өчен батырлык дәресе уздырылды

4 февральдә Зәй политехник колледжында гадәти булмаган дәрес үтте. Ул Бөек Ватан сугышында җиңүнең – 75, ТАССРга 100 ел тулуга багышланган “Сталинград: 200 көн батырлык һәм ныклык” дип аталган тарих дәресе иде. Бу көнне студентлар өчен дәресләрне Зәй туган як тарихын өйрәнү музее хезмәткәрләре һәм “Гвардия” хәрби-патриотик эзтабарлар клубы әгъзалары бирде. Дәрес башланыр алдыннан Бөек Ватан сугышында катнашкан якыннарың турында мәгълүмат алу өчен “Хәтер китабы” һәм “Татфронт.ру” сайты белән дә танышу булды. -Документаль кинохроника, сугыш чоры җырлары яңгырады дәрестә, чөнки тарих дәресләрендә Бөек Ватан сугышы темасына күп сәгать бирелми бит. “Гвардия” клубы җитәкчесе Виктор Никифоров Сталинград сугышы, халыкның батырлыгы, эзтабарлар отрядының сугышта ятып калган солдатларның җәсәдләрен казу эшләрендә катнашулары турында сөйләде. Бу көнне студентларның да әлеге эзтабарлар отрядына язылу мөмкинлеге бар иде, ди Зәй музееның өлкән фәнни хезмәткәре Светлана Долгова. Дәрес барышында Сталинград сугышында катнашкан якташларыбыз Советлар Союзы Герое Николай Майков, Александр Невский ордены кавалеры Кәлимулла Габитов, Мөбарәк Вәлишин, Габдулла Шаһиев, Андрей Западнов, Григорий Лукьянов, Николай Мишаров, Андрей Моисеев, Павел Краснов, Михаил Тарасов, Леонид Мечтаков … һәм яу кырларында ятып калган солдатларыбыз исеме яңгырады: Гарифуллин Сагыйдулла Гафируллович, Бура-Киртә. 13.11.1942 елда һәлак булган.. Гафаров Биктимер Г., Югары Пәнәче. 18.09.1942. Ибраһимов Ильяс Якуп улы, Кәрәкәс. 20.09.1942. Ишминов Михаил Федорович, Сәвәләй. 24.10.1942. Каштанов Михаил Васильевич, Иске Бүсерәк. Яралардан 16.01.1943 елда үлә. Кириллов Петр Севастьянович, Нәлем. 18.09.1942. Кузьмин Степан Иванович,Бассар. 19.09.1942. Мурлин Дмитрий Васильевич, Шумыш. 09.12.1942. Мухтеев Василий Федорович, Иске Пәлчикәү. 19.09.1942. Садыйков Гариф Кәрим улы, Карман. 12.10.1942.. Хәмидуллин Фәхрулла Хәмидулла улы, Чыбыклы. Яралардан 05.10.1942 елда үлә. Әлеге батыр якташларыбызга мәңгелек дан.