Зәйлеләр «Көчле рухлылар: разведчиклар һәм партизаннар турында китаплар укыйбыз» Бөтенроссия акциясенә кушылды

Зәй үзәк балалар китапханәсе янә «Көчле рухлылар: разведчиклар һәм партизаннар турында китаплар укыйбыз» Бөтенроссия акциясенә кушылды. Бу акция Бөек Ватан сугышы елларында совет разведчиклары, партизаннарның батырлыгына багышлана һәм «Бөек Ватан сугышы партизаны» (1943 елның 2 феврале) медален гамәлгә кую уңаеннан оештырыла. Сугыш елларында бу медаль белән 127 меңнән артык кеше бүләкләнә: болар - партизан хәрәкәтләре җитәкчеләре, аерылып торган партизаннар һәм разведчиклар, батыр пионерлар. Китапханә хезмәткәрләре «Күкчәчәк” балалар бакчасыннан килгән сабыйларга совет разведчикларының сугышчан батырлыклары турында сөйләделәр, аларны холлдагы Бөек Ватан сугышында Җиңүнең 75 еллыгына багышланган инсталляцияләр белән таныштырдылар, «Батырлык мәңге яши» дип исемләнгән күргәзмәдәге китаплар турында сөйләделәр. Совет кешеләренең сугышчан батырлыклары язылган өзекләр укыдылар. Малайлар һәм кызлар, шулай ук, герой якташларыбыз турында мәгълүматны зур кызыксыну белән тыңладылар.