Музей хезмәткәрләре Бөек Ватан сугышы ветераны янында

2020 елның 29 гыйнварында туган якны өйрәнү музее фонды сакчылары сугыш ветераны Моисеева Анна Ивановна янына бардылар. Әңгәмә барышында Анна Ивановна музей хезмәткәрләренә үз язмышы һәм фронттагы вакыйгалар турында сөйләде. Ул музейга үзенең Мактау грамоталарын, Рәхмәт хатларын, диплом һәм фоторәсемнәрен тапшырды. Әлеге материал алга таба хәрби – патриотик темаларга багышланган чараларга, күргәзмәләргә әзерләнгәндә кирәк булачак. Анна Ивановна 1923 елның 15 февралендә Зәй шәһәрендә туа, урта махсус белем ала. Гамәлдәге армиягә 1942 елның июнендә Зәй районы хәрби комиссариатыннан мобилизацияләнә. 1942 елның июленнән 1945 елның сентябренә кадәр Беренче Белоруссия фронтының 61 нче армиясе 473 нче кыр күчмә хирургия госпитале составында була. Медицина хезмәтенең кече сержанты Моисеева А.И. Мәскәүдән Берлинга кадәр юл үтә. 473 Госпиталь җиңүдән соң ярты ел дәвамында, Совет Армиясе сугышчыларын дәвалауны дәвам итеп, Берлинда эшли. Батырлык һәм үз эшенә тугрылык өчен Анна Ивановна “Сугышчан казанышлары өчен”, “Берлинны алган өчен" медальләре белән, шулай ук ике II дәрәҗә Ватан сугышы ордены белән бүләкләнгән. Демобилизациядән соң Зәй район хастаханәсендә шәфкать туташы булып эшли. Медицина стажы-40 ел. Татарстан хатын-кызларының фронт хезмәтен йөзләгән мисаллар ачык тасвирлый. Аларның фашизмга каршы көрәштә күпләп катнашуы-сугыш елъязмасында аерым сәхифә, ул аларның батырлыгы, каһарманлыгы, үз-үзләрен корбан итүен раслый.