Зәй үзәк район хастаханәсенә яңа җитәкче билгеләнде

Бүген Зәй үзәк район хастаханәсе коллективына яңа баш табибны тәкъдим иттеләр. Бу вазыйфага ТР сәламәтлек саклау министры Марат Садыйков боерыгы белән Айдар Фатыйхов билгеләнде, элек ул Казанның «АМ медик» шәхси клиникасында шундый ук вазифаны биләгән һәм Республика клиник хастаханәсенең санавиациясе белән җитәкчелек иткән. Район үзәк хастаханәсе коллективына яңа җитәкчене республиканың сәламәтлек саклау министры урынбасары Илдар Фатыйхов һәм район башлыгы Разиф Кәримов тәкъдим иттеләр. Район үзәк хастаханәсен 5 ел дәвамында җитәкләгән Рим Әмиров Бөгелмә үзәк район хастаханәсенең баш табибы итеп билгеләнде. Район башлыгы Разиф Кәримов һәм министр урынбасары Илдар Фатыйхов Айдар Фатыйховка яңа урында уңышлар теләделәр.