Зәйлеләрне «Бала хокук дөньясында» дигән социаль видеороликлар конкурсында катнашырга чакыралар

Иң яхшы роликларның авторлары 20 мең сум күләмендә акчалата премияләр алачак. 10 сентябрьдән 20 ноябрьгә кадәр Татарстанда «Бала хокук дөньясында» («Бала хокук даирәсендә») мәгълүмати-социаль видеороликлар республика конкурсы узачак. Конкурс алтынчы ел рәттән, уку елы башында үткәрелә. Анда 6-30 яшьлек балалар һәм яшьләр катнаша. Балалар роликларны аерым да, төркем составында да, шулай ук иҗади коллективларда да тәкъдим итә алалар. Эш Бала хокуклары турындагы конвенциядә күрсәтелгән, балаларның төп хокукларына бер яки берничә нигез салучы хокукларга багышланган булырга тиеш. Видеороликта дөньяда, Россиядә яки Татарстанда балалар хокукларын яклау темасына багышланган проблема күтәрелергә тиеш. Видеороликның озынлыгы ике минуттан да артмаска тиеш. Эш жанры теләсә нинди булырга мөмкин. Бәйге өч этапта узачак. Беренче этап 10 сентябрьдә старт ала һәм 20 октябрьгә кадәр дәвам итәчәк. Теләсә кайсы вариантта видеороликларны һәм гаризаларны Татарстан Республикасында Бала хокуклары буенча вәкаләтле вәкил адресына җибәрергә кирәк. Һәр эш җибәрүчегә роликның алынган һәм ачык булуы турында хәбәр җиткерелә. Икенче этап-сайлап алу этабы, ул 21 октябрьдән 10 ноябрьгә кадәр узачак, бу вакытта жюри киләсе этапка роликларны сайлап алачак. Йомгаклау этабы 11-15 ноябрьдә узачак. Жюри видеороликларны сигез критерий буенча бәяләячәк. Нәтиҗәләр буенча рейтинг төзелә. Максималь балл җыйган ун ролик җиңүче булачак. Аларның авторлары диплом һәм 20 мең сум күләмендә акчалата премияләр алачак. Шулай ук социаль челтәрләрдә урнаштырылган видеороликка карата уңай шәрехләр саны буенча, агымдагы елның 15 ноябреннән дә соңга калмыйча тамашачылар симпатиясе призы иясе билгеләнә. Тамашачылар симпатиясе призы иясе, диплом һәм 10 мең сум күләмендә акчалата премия белән бүләкләнә