Зәй районында халык җыеннары дәвам итә

16 август көнне Сәвәләй һәм Якты Күл авыл җирлекләрендә халык җыеннары булып узды. Авыл җыены-ул авыл халкы һәм хакимият вәкилләре арасында үзенә күрә бер күпер. Нәкъ менә шундый очрашулар вакытында кешеләр үзләрен борчыган сорауларны турыдан-туры бирә, теләкләрен җиткерә алалар. Халык белән очрашуга муниципаль район башлыгы Р.Г. Кәримов, депутатлар, шулай ук шәһәр һәм район хезмәтләре һәм ведомстволары вәкилләре килде. Муниципаль район башлыгы авыл халкын 2019 елның беренче яртыеллыгында районның социаль-икътисади үсеш күрсәткечләре һәм агымдагы елга перспектив юнәлешләр белән таныштырды. Авыл җирлекләре башлыкларының Татарстан Республикасында программа гамәлдә булган биш ел эчендә үзара салым программасы буенча башкарылган эшләр турында чыгышлары тыңланды. Көн тәртибенә шулай ук авыл халкының эшлекле активлыгын арттыру, хуҗалык итүнең кече формаларын үстерү, йорт хайваннары һәм кош-корт авыруларын кисәтү, авыл җирлекләрендәге оператив хәл мәсьәләләре дә кертелгән иде. Россия Эчке эшләр министрлыгының Зәй районы буенча бүлеге участок вәкаләтлеләре хезмәте башлыгы урынбасары В.Попов гражданнарны закон һәм тәртип сакларга, мошенниклардан сакланырга, игътибарлы һәм уяу булырга, бигрәк тә өлкән яшьтәге кешеләргә карата игътибарлы булырга чакырды. Авыл халкы үзләрен борчыган проблемалары белән уртаклашты һәм күтәрелгән барлык сорауларга да тулы җаваплар алды. Җирле хакимият алга таба да үзенең эшен гражданнарның фикерен исәпкә алып, оешмалар һәм, әлбәттә инде, халык ярдәменә таянып дәвам итәчәк.