Район башлыгы район Икътисад Советының чираттагы утырышын үткәрде

Бүген район башлыгы Разиф Кәримов рәислегендә район Икътисад Советының чираттагы утырышы узды. Көн тәртибендәге тема буенча фикер алышуга керешкәнче, ул катнашучыларны районның беренче яртыеллыгындагы төп икътисадый күрсәткечләре белән таныштырды, көчле яңгырлардан соң урып-җыю эшләренең барышы турында сөйләде. Шартлар начар булуга карамастан, бөртекле культураларның уртача уңышы буенча район республикада алдынгы урында тора, уңдырышлылыгы гектардан 60-70 центнердан артып китә торган басулар бар. Район басуларында 52 ашлык җыю комбайны эшли, механизаторлар үстерелгән уңышны югалтуларсыз җыеп алу өчен кулдан килгәннең барын да эшлиләр. «Җир төзелеше бюросы» ҖЧҖнең 2019 елның 1 яртыеллыгындагы эшчәнлеге нәтиҗәләре һәм 2019 елга перспектив планнары турында» төп доклад белән « Җир төзелеше бюросы» ҖЧҖ директоры Әгъләмов Рәсил Васыйл улы чыгыш ясады. Ул оешманың төп эшчәнлек юнәлешләре, шул исәптән кадастр эшләре, җир төзелеше, топография-геодезия эшчәнлеге турында сөйләде. Күрсәтелгән хезмәтләр гариза бирү характерында, хезмәткәрләр саны 9 кеше тәшкил итә. Эшләрнең төп күләме документларны эшкәртүгә туры килә. 2019 елда предприятие алдында түбәндәге бурычлар тора: хезмәт күрсәтүнең сыйфатын арттыру һәм срокларын киметү, хезмәт күрсәтү күләмнәрен арттыру, җир участокларының категориясен үзгәртү, территориаль планлаштыру кебек эш төрләрен үзләштерү. Докладчы чыгышыннан соң Икътисадый Совет әгъзалары үзара фикер алыштылар. Утырышка район башлыгы Разиф Кәримов йомгак ясады.