Район башлыгы Р.Г.Кәримов авыл-хуҗалыкларындагы эш торышы белән танышты

Бүген район башлыгы Р.Г.Кәримов атна саен уза торган традицион авыл хуҗалыгы формированиеләрендә булды. Аның белән бергә авыл хуҗалыгы һәм азык-төлек идарәсе башлыгы һәм баш белгечләре, район бүлекчәләре һәм агрофирмалары җитәкчеләре катнашты. Бу атнада маршрутка 10 объект кертелгән иде. Тикшерү барышында «Дурт-Мунча», «Куш-Елга», «Әхмәт», «Чыбыклы» сөт-товар комплексы, «Сәвәләй», «Югары Шепкә», «Бура-Киртә» сөт-товар фермаларында һәм «Поручик» симертү комплексындагы эш барышы тикшерелде. Район башлыгы терлекчелек һәм сөт - товар комплексларында савым сыерларын тоту һәм ашату технологияләренең үтәлешен, авыл хуҗалыгы продукциясен җитештерү темпларын карады. Р.Г.Кәримов «Югары Шепкә» МТФНЫҢ терлекчелек корпусын ремонтлау эше буенча үзенең тәнкыйди кисәтүләрен җиткерде. Ул шулай ук Зәй-2дә урнашкан 5-нче номерлы ремонт цехында булды, анда ул чөгендер җыю комбайннарын ремонтлау барышы белән танышты. Район агрофирмаларының баш инженерлары, ремонт цехы коллективлары, шулай ук «Агрокөч» АҖ инженерлык хезмәте вәкилләре белән очрашты. Чарада катнашучылар ремонт мәйданчыкларын җентекләп карадылар, 15 августка кадәр чөгендер җыю техникасын ремонтлауны төгәлләү һәм комбайннарны кабул итү бурычын куйдылар. Кирәкле запас частьлар, майлар, фильтрлар алынды. Бүгенге көндә әзерлек 95% тәшкил итә. Ремонт эшләре бу атнада тәмамланачак. Дүшәмбедән, график буенча, кабул итү башланачак. Шикәр чөгендерен җыюга 22 августта керешергә планлаштыралар.