«Работа в России» порталы – эш бирүчеләргә кадрлар сайлауда нәтиҗәле ярдәмче

Зәй шәһәре халык мәшгульлеге үзәге “Работа в России” Гомумроссия вакансияләр базасы мәгълүмати-аналитик системасы эше хакында искәртә. Ул – кадрлар сайлау һәм эш эзләү өчен Россиядә дәүләт ярдәме белән эшләүче беренче портал. “Работа в России” порталы эш бирүчеләргә кадрлар сайлауда, ә гражданнарга эш табуда ярдәм итү өчен булдырылган. Ул бөтен илдән җыелган вакансияләрне туплап торучы уникаль базадан тора. Портал бүтән ресурслардан үзенең универсальлеге һәм уңайлыклары белән аерылып тора. Анда эш урыны белән якында урнашкан сәламәтлек саклау, белем бирү, мәдәният һ.б. учреждениеләр турында мәгълүмат тупланган. Вакансияләр базасы халык мәшгульлеге хезмәте органнары системаларында булган һәм эш бирүчеләр тарафыннан мөстәкыйль рәвештә урнаштырылган мәгълүматлар нигезендә формалаша. Шулай ук эш эзләүчеләр тулыландырып торган резюмелар базасы да бар. Эш бирүчеләр тарафыннан вакансияләр урнаштыру! Вакансия урнаштыру өчен: • http://trudvsem.ru/ порталында теркәлеп, «Шәхси кабинет” булдырырга кирәк; • “Шәхси кабинет”та күрсәтелгән мәгълүматларны тикшерүдән соң, эш бирүче вакансияләр урнаштыра һәм эш эзләүчеләрнең резюмыларын карый ала. Эш бирүче “Шәхси кабинет” аша эш эзләүчеләрнең вакансияләрне бәяләвен күрә алачак. Эш эзләүчеләр тарафыннан резюме урнаштыру! Резюме булдыру өчен, http://trudvsem.ru/ порталында теркәлергә кирәк. Теркәлү берничә генә минут вакытны алачак. Моның өчен электрон почта адресы яки мобиль телефон номеры кирәк. Теркәлү дәүләт хезмәтләре порталында башкарыла, аннан соң “Работа в России” порталына кайтарыла. Эш эзләүче дәүләт хезмәтләре порталында теркәлгән икән, “Работа в России” порталына керү өчен үз логины һәм паролен куллана ала.