Зәй почетлы гражданины, элеккеге имам- мөхтәсиб Сәгыйть хәзрәт Камалов белән хушлаша

Бүген таңда озак еллар Зәй районы имам-мөхтәсибе вазифасын башкарган Сәгыйть хәзрәт Камалов арабыздан китеп барды. 27 майда аңа 83 яшь тулган булыр иде. Сәгыйть хәзрәт чирек гасырдан артык намус белән зәйлеләрне рухи агартуга хезмәт итте, күп кенә мәчетләр төзелешен башлап йөрде, 13 ел Зәй районы имам- мөхтәсибе җаваплы вазифасын башкарды, 2016 нчы елдан Татарстан Диния нәзарәтендә аксакаллар шурасы әгъзасы буларак, шураның Зәй бүлеген җитәкләде. Сәгыйть хәзрәт һәрвакыт тынгысыз, ышанычлы һәм җаваплы мөхтәсиб, ихлас мөселман булды. Мәгънәле, үтемле үгет – нәсихәтләре, мәрхәмәтлелек, миһербанлылык һәм дә шәфкатьлелек тәрбияләүгә юнәлтелгән вәгазьләре белән яшьләребезне тугры, гадел, иманлы гамәлләргә өндәде. Ислам диненең иң яхшы гореф-гадәтләрен саклап калу, милләтне рухи камиллеккә күтәрү кебек изге эшләрне күп башкарды. Күпкырлы эшчәнлеге нәтиҗәсендә Сәгыйть Камалов төрле дәүләт бүләкләренә: “Казанның 1000 еллыгы” медале, ике мәртәбә Татарстан Республикасы Президентының Рәхмәт хаты, Татарстан Республикасы мөселманнары Диния нәзарәтенең “Халкыбызга хезмәте өчен” медале, Бөтендөнья татар конгрессы рәисенең Рәхмәт хаты һәм “Зәй муниципаль районының почетлы гражданины” дигән югары исемгә лаек булды. Сәгыйть хәзрәтне соңгы юлга озату җеназа намазы үзәк мәчеттә көндезге сәгать 1дә укылачак. Хәзрәт Яңа шәһәр зиратына җирләнәчәк.