Зәйдә Мәдәният елына старт бирелде

Һәр өлкәдә булсын мәдәният! Районда Мәдәният елына шундый шигарь астында старт бирелде. Бүген «Энергетик» мәдәният сараенда Зәй муниципаль районында Мәдәният елын ачу тантанасы узды. Зәйлеләргә сәламләү сүзе белән район Башкарма комитеты җитәкчесе Илнар Хафизов мөрәҗәгать итте. Ул район башлыгы Разиф Кәримов исеменнән мәдәният һәм мәгариф хезмәткәрләренә, милли-мәдәни берләшмәләр җитәкчеләренә борынгыдан килгән гореф-гадәтләрне, бәйрәмнәрне торгызу һәм киң җәмәгатьчелеккә җиткерү буенча куйган хезмәтләре өчен рәхмәт белдерде. Шулай ук Илнар Фәнил улы Мәдәният елын югары дәрәҗәдә үткәрербез дигән ышанычын белдерде, 2019 елда безнең талантлар һәм максатчан кешеләр өчен яңа мөмкинлекләр барлыкка киләчәк, дип билгеләп үтте. Үз чиратында һәркем җәмгыятьтә һәр кешенең, һәр гаиләнең үз-үзен тоту культурасы зур финанс чаралары таләп итмәгәнен истә тотарга тиеш. Әлеге чарада шәһәр һәм район коллективлары катнашты. Елны ачу тантанасы мәдәният барлыкка килүне чагылдыручы лазер- шоудан башланды. Мәдәният төрле юнәлешләрдә : авыл хуҗалыгы, гаилә, спорт, юлда, аралашуда күрсәтелде. Икенче каттагы бию фойесында "50 ел эчендә мәдәният үсеше"дигән күргәзмә оештырылган иде.