Район Башкарма комитеты җитәкчесе авыл җирлекләре башлыклары белән киңәшмә үткәрде

Бүген хакимиятнең кече залында район Башкарма комитеты җитәкчесе Илнар Хафизов авыл җирлекләре башлыклары белән киңәшмә үткәрде. Көн тәртибендәге төп мәсьәлә буларак авыл җирлекләрендә халыктан торак-коммуналь хезмәтләр өчен бурычны җыю каралды. «Теплосервис» ҖЧҖ директоры Рәйхәт Гарипов, «Зәй шәһәре ТКХ ИК» ҖЧҖ директоры Галина Камышова, «НК-сервис - Зәй» ҖЧҖ директоры Илнур Йосыпов чыгышлары шушы темага багышланды. Күп фатирлы йортларда яшәүчеләрнең коммуналь хезмәтләр алдында бурычы 1 миллион 600 мең сумнан артып киткән. Хезмәт күрсәтүче оешмалар вәкилләре сүзләренә караганда, ул соңгы елда сизелерлек арткан, ә бу , үз чиратында, алга таба күрсәтелә торган хезмәтләрнең сыйфатында да, әлеге оешмаларның икътисади күрсәткечләрендә дә чагылыш табарга мөмкин. Киңәшмәдә шулай ук авыл җирлекләренә шәһәр төзелеше документациясе өлешендә вәкаләтләр тапшыру, 2018 елның 9 аенда район башкарма комитеты административ комиссиясенең эш нәтиҗәләре турында мәсьәләләр каралды. Киңәшмәгә йомгак ясап, район Башкарма комитеты җитәкчесе Илнар Хафизов авыл җирлекләре башлыкларын халык белән аңлату эшләрен активлаштырырга чакырды.