Зәйнең шикәр заводы коллективы зур бүләккә лаек булды

Бүген “Зәй шикәре” заводында шатлыклы вакыйга булды. Тантаналы чарада “Челтәр компаниясе” генераль директоры Илшат Фәрдиев, район башлыгы Разиф Кәримов, шикәр чөгендере үстерү, эшкәртү тармагы буенча эшләүче район җитәкчеләре катнашты. Завод директоры Шамил Минһаҗев һәм предприятие коллективы тантаналы шартларда, сакчыл җитештерү өлкәсендә дөнья күләм танылган Япония белгече Тосихиро Ямада кулыннан, сак җитештерү ысулын отышлы кулланылышка керткән өчен зур бүләк - “Тойота”ның бронза кубогын алды. Татарстанда азык җитештерү предприятиеләре арасында “Зәй шикәре” бронза кубокка ия булган бердәнбер оешма. Соңгы өч елда шикәр заводы сакчыл җитештерү программасы буенча эшләп 90 миллион сумнан артык файда эшләгән. Гомумән завод агымдагы елда тәүлегенә 7500 тоннадан артык татлы тамыр эшкәртүгә иреште.