19 гыйнвар – Кач ману.

Православие динен тотучылар өчен ул - иң олы дини бәйрәмнәрнең берсе. Бу көнне күпләр махсус урыннарда изгеләндерелгән суда коена. Узган ел коену урыны Карамалы күлендә оештырылган иде. Быел исә әлеге максатта яңа урын билгеләнде, ул – Иске Зәйне әйләнеп узу юлындагы Изге Чишмә. Биредә көздән башлап зур төзекләндерү эшләре башкарылды, чишмәгә төшү юллары тәртипкә китерелде, коенырга теләүчеләр өчен уңайлыклары булган коену (купель) һәм чишенү-киенү урыннары эшләнде. Шунысын да әйтик, чишмәнең юл буендагы өске өлешендә һәм коену урынында төзелгән шатер түбәләр астында караңгы вакытта яктырту өчен,”кояш” батареяләре белән җиһазландырылган яктырткычлар урнаштырылды. Алар түбә астына кеше кергән очракта гына автомат рәвештә эшли. Чишмәгә изгеләндерелгән су алырга яисә коенырга килүчеләргә быел да район башкарма комитеты тиешле шартлар тудыру хәселен күрә. 19 гыйнварда Яңа Зәй белән Иске Зәй арасында йөрүче маршрут автобусы (№4) иртәнге сәгать 9дан кичке 7гә кадәр Иске Зәйгә әйләнеп узу юлыннан Изге чишмә яныннан узачак һәм биредә тукталыш ясалачак. Бүгеннән башлап һәм иртәгә көн дәвамында гадәттән тыш хәлләр структурасы һәм медицина ярдәме күрсәтү хезмәткәрләренең кизү торуы оештырыла, җылыну өчен махсус ике автобус куелачак.