Район башлыгы яшүсмерләрне сөендерде

Бүген Зәй районында ике яшүсмер, район башлыгы Р.Г.Кәримовтан үзенчәлекле бүләккә ия булдылар. Сармашбаш авылыннан 6нчы сыйныф укучысы Альмир Гыйниятуллин һәм Якты Күл авылыннан, хәзерге вакытта Зәй политехник колледжында 3 курс студенты Сергей Филипповка ноутбуклар тапшырылды. Гыйниятуллиннар гаиләсе ут-күз казасы аркасында быел зур кайгы кичерде, ә киләчәктә программист булырга хыялланган Альмир өчен заманча компьютерлы булу, тормышка ашмас хыял булып тора иде. Яшүсмернең хыялы турында белеп алган район башлыгы, аны үтеп баручы елның соңгы көнендә тормышка ашырды. Альмирның әти-әниләре мәдәният йорты хезмәткәре Алсу һәм 29 ел буе җирлектә механизатор булып эшләүче Раушан Гыйниятуллиннар авыр вакытларда ярдәм кулы сузган района җитәкчелегенә, улларын тагын беркат сөендергән Разиф Галиевичка бик зур рәхмәтле булуларын ихлас күңелдән белдерделәр. Сергей Филипов исә 19 яшьлек кенә булуына карамастан, бүгенге заманның «герое» дип аталырга тулы хокуклы егет. Ул ятим калган үзеннән дә кече булган эне-сеңелләрен опекунлыкка алып, аларны балалар йортына җибәрелүдән йолып калды. Разиф Кәримов, яшүсмерләргә бүләкләр тапшырганда аларның киләчәктә дә район горурлыгы булуларын теләде, бүген тормыш сынауларын җиңеп барулары соклангыч аларның, диде.Сармашбаш авыл җирлеге башлыгы Ләйсән Хөснетдинова, район башлыгының барлык халык өчен яшәүгә уңай шартлар тудыруга омтылуы өстенә, аерым гаиләләрне дә игътибар үзәгеннән читтә калдырмавын, һәр зәйленең хәленә керүен билгеләп үтте, барлык райондашлар исеменән рәхмәт белдерде, имин еллар теләде.Үзенчәлекле чарага чакырылучылар Кыш бабай һәм Кар кызыннан да котлау, бүләкләр алды.