Район башлыгы Разиф Кәримовның Белем көне белән котлавы

Кадерле укучылар һәм студентлар, хөрмәтле педагоглар һәм ата-аналар! Сезне чын күңелдән Белем көне һәм яңа уку елы башлану белән котлыйм! Беренче сентябрь – һәр гаилә өчен яраткан, күптән көтелгән бәйрәмнәрнең берсе. Һәр дәреснең, һәр яңа уку көненең бала тормышында мөһимлеген аңлап, балалар белән бергә ата-аналар да дулкынлана. Быел 400 бала беренче мәртәбә шәһәр һәм район уку йортлары бусагасын атлап керәчәк. Алар өчен бу мәктәп, беренче укытучы, сыйныфташлары белән танышу, алар аерым котлауларга лаек. Без нәкъ менә мәктәптә дөньяны танып белергә өйрәнәбез. Нәкъ менә монда чын дуслар табабыз һәм вакыт узу белән безнең өчен эш-гамәлләр үлчәменә әверелә торган укытучылар белән очрашабыз. Районыбызның үз эшенә бирелгән педагоглары яшь буынны укыту һәм тәрбияләү мөһим миссиясен намус белән үтиләр, тирән белем белән бергә аларда рухи-әхлакый сыйфатлар, ватанпәрвәрлек, туган якка мәхәббәт тәрбиялиләр, дөрес тормыш юлын сайларга ярдәм итәләр. 170 егет һәм кыз политехника көллиятендә һөнәри белем алуга беренче адымнарын ясый. Һөнәр – кеше тормышының ышанычлы нигезе, иминлеге һәм уңышы. Яңа уку елы укучыларга һәм студентларга уңышлар, җиңүләр һәм казанышлар китерсен. Өйрәнелмәгән нәрсәләргә төшенегез, бүген яхшы белем – тормыш уңышының нигезе икәнен истә тотыгыз. Ата-аналарга һәм педагогларга – илһам һәм зирәклек, һөнәри һәм иҗади җиңүләр! Барыгызга да ныклы сәламәтлек, иминлек һәм тыныч күк йөзе телим.