Зәй шикәр заводында чимал кабул итү башланды

18 августта районыбыз хезмәтчәннәре шикәр чөгендере казуга керештеләр. Бүгенге көндә барлык өч агрофирманың да чөгендер басуларында эш алып барыла. Эшкә 10 Ропа Тигр комбайны һәм 3 Ропа Маус төягече җәлеп ителгән. Бүген район аграрийлары чималны эшкәртүгә тапшыра башладылар. Бу уңайдан район башлыгы Р.Г. Кәримов эш визиты белән Зәй шикәр заводында булды һәм шикәр чөгендеренең беренче машиналарын кабул итүдә катнашты. Разиф Гали улы кырлардан чимал ташучы машина йөртүчеләр белән аралашты, аларга аварияләрсез уңыш эш, ә кагат кыры эшчеләренә татлы тамырны вакытында бушатуларын һәм кагатларга салу эшен уңышлы башкаруларын теләде.