Район башлыгы Бөек Ватан сугышы ветеранын туган көне белән котлады

Бөек Ватан сугышында катнашучы, Зәй ГРЭСын төзүчеләрнең берсе, Зәй муниципаль районының һәм бөтен республиканың горурлыгы Леонид Яковлевич Мачтаков бүген туган көне белән котлаулар кабул итә. Ветеранны беренчеләрдән булып район башлыгы Разиф Кәримов, ГРЭС директоры Дмитрий Прохоров, халыкны социаль яклау бүлеге башлыгы Эльмира Хуҗина, район ветераннар советы рәисе Алексей Алексеев котладылар. Шулай ук Россия Федерациясе Дәүләт Думасы депутаты Олег Морозов исеменнән котлауларны аның ярдәмчесе тапшырды. "Сез безгә зур җиңү китергән, республика, илебезнең энергетика тармагында тирән эз калдырган кеше. Сез районның, илебезнең горурлыгы, батырлык һәм Ватанга фидакарь хезмәт үрнәге булып торасыз. Барысы өчен дә рәхмәт сезгә», - диде хөрмәтле ветеранга Разиф Галиевич. Леонид Яковлевич 1923 елның 18 августында ТАССРның Зәй районы Перцовка авылында туа. 1942 елда фронтка китә, Мәскәүне саклауда, Сталинград контрһөҗүмендә, шулай ук Курск дугасындагы сугышта катнаша. 1953 елда Урал политехника институтын тәмамлый. 1956 елдан Леонид Мачтаковның хезмәт эшчәнлеге Зәй ГРЭС төзелеше белән бәйле. Электростанциядә ул 37 ел эшли. Леонид Яковлевич җитәкчелегендә Зәйдә кыска вакыт эчендә бик күп социаль объектлар төзелде. Шул ук вакытта ул шәһәрне төзекләндерүгә һәм яшелләндерүгә зур өлеш кертте. Ветеран II дәрәҗә «Ватан сугышы» ордены, «Батырлык өчен», «Сталинград оборонасы өчен», «Сугышчан казанышлар өчен» медальләре белән бүләкләнгән, Югары Башкомандующий И.В. Сталин имзасы белән җиде грамотасы бар. Хөрмәтле ветеранга сәламәтлек һәм күңел күтәренкелеге телибез.