Зәйдән гуманитар ярдәмнең 62 нче партиясе урынга илтеп тапшырылды
11 августта Зәй муниципаль районы башлыгы Разиф Кәримов гуманитар миссия белән махсус хәрби операция зонасына кузгалды. Зәй «Бердәм Россия» партиясенең Татарстан бүлекчәсе колоннасы составында гуманитар йөкнең 62 нче партиясен озатты.
Традиция буенча Азатлык китерүче солдат һәйкәле янына гуманитар ярдәмне озатуга багышланган чарага шәһәр-район халкы, предприятие-оешмалар, учреждениеләр җитәкчеләре, авыл җирлекләре башлыклары җыелды.
20 тонна гуманитар ярдәм Лисичанск һәм Рубежное шәһәрләренә кураторлык итүче Татарстан Республикасы Премьер-министры урынбасары Фәнил Әһлиуллин заявкасы буенча формалаштырылды һәм Рубежное шәһәренә китерелде. Гуманитар ярдәмне Зәй муниципаль районы башлыгы Разиф Кәримов үзе озата барды. Шулай ук район башлыгы белән бергә Марат Кыямов, машина йөртүчеләр Рәйхат Габидуллин, Виталий Софин да бу миссияне үтәде.
«Бердәм Россия» колоннасы составында 9 зур йөк машинасында Татарстаннан шефлыкка алынган Лисичанск һәм Рубежное шәһәрләрендә яшәүчеләргә, шулай ук махсус хәрби операциядә катнашучыларга гомуми авырлыгы 140 тонна булган гуманитар йөк җибәрелде. Җыелган гуманитар ярдәм арасында төзелеш материаллары, су, кием-салым, балалар товарлары һәм мәктәп кирәк-яраклары, квадрокоптерлар, 2 машина һәм запас частьләр һәм башкалар бар.
2022 елның февраленнән 2025 елның июненә кадәр Луганск Халык Республикасына “Бердәм Россия” партиясенең Татарстан төбәк бүлеге эгидасы астында 3414 тоннадан артык җыелган гуманитар ярдәм белән 223 йөк машинасы җибәрелгән.
Рубежное шәһәрендә яшәүчеләр, шефлыкка алынган шәһәрләрнең социаль-мәдәни объектларын торгызучы хәрбиләр һәм төзүчеләр, алар арасында Зәйдән дә кешеләр бар, зәйлеләргә игътибарлары һәм ярдәмнәре өчен рәхмәт белдерделәр.