Зәйдә хәрби хезмәткәр Рамил Газизовны соңгы юлга озаттылар
Бүген зәйлеләр махсус хәрби операция зонасында хәрби бурычын үтәгәндә һәлак булган якташыбыз - хәрби хезмәткәр Газизов Рамил Рәфис улын соңгы юлга озаттылар. Матәм панихидасы «Энергетик» мәдәният йортында узды. Татарстан Республикасы Рәисе Рөстәм Миңнеханов, Зәй муниципаль районы башлыгы Разиф Кәримов һәм шәхсән үзе исеменнән солдатларның туганнарына һәм якыннарына, барлык зәйлеләргә кайгы уртаклашу сүзләре белән район башлыгы урынбасары Петр Уразайкин мөрәҗәгать итте.
"Рамил Рәфисович кебек батыр сугышчылар аркасында без барыбыз да тыныч күк астында яшибез. Россияне ныклыгына берничә тапкыр сынадылар, ләкин туган җирне яратуга һәм аның язмышы өчен җаваплылыкка нигезләнгән халык бердәмлеге һәрвакыт җиңеп чыкты. Барыбыз да сезнең белән бергә кайгырабыз. Без Рамил Газизов белән горурланабыз һәм аның якты истәлеген күңелләребездә озак сакларбыз. Сугышчы тыныч йокласын", - диде Петр Сергеевич.
Шулай ук хәрби комиссар Әгъләмҗанов Айрат Фоат улы да кайгы уртаклашу сүзләрен җиткерде. Солдатны бер минут тынлык белән искә алдылар. Хәрби хезмәткәрне соңгы юлга барлык хәрби хөрмәтләр белән озаттылар.
Газизов Рамил Рәфис улын "Мирный" микрорайоны зиратына җирләделәр. Каһарманнарыбызга мәңгелек хәтер һәм дан!