Политехник көллияттә чыгарылыш студентларына диплом тапшыру тантанасы узды

Яшьлек бәйрәме –ул, әлбәттә, Яшьләр көне. Быел аны ил 28 июньдә, традиция буенча, июньнең соңгы шимбәсендә бәйрәм итә. Бу көн активлыкны, энергияне һәм яңа казанышларга омтылуны символлаштыра, һәм безнең һәрберебез нәкъ менә яшьлек зур үзгәрешләр һәм мөмкинлекләр чоры икәнен тоя. Көллияттә бу искиткеч вакыйганы, гадәттәгечә, чыгарылыш студентларына дипломнар тапшыру тантанасына багышладылар. Быел алар 141 кеше, 19ы кызыл диплом белән бүләкләнде. Аларның һәрберсе горурланып укуларын тәмамлау турында таныклык тота, ә күзләрендә иртәгесе көнгә өмет һәм ышаныч күренә. Залда- бәйрәм кәефе, һавада - мөстәкыйль тормышның киләчәген сизенү шаукымы. Район башлыгы Кәримов Разиф Гали улы барлык чыгарылыш укучыларына хезмәтләре, тырышлыклары һәм белемгә омтылулары өчен рәхмәт белдерде. Ул билгеләп үткәнчә, нәкъ менә яшьләр – прогрессның этәргече һәм районыбызның һәм илебезнең яхшы киләчәгенә өмет ул. Ата-аналар көллият һәм администрация педагогларына яшьләргә белем һәм тәрбия бирүдә бәяләп бетергесез өлеш керткәннәре өчен рәхмәт сүзләре белән мөрәҗәгать иттеләр. Аларның ярдәме, сабырлыгы һәм һөнәри осталыгы уку йортын тәмамлаучыларга үз максатларына ирешү юлындагы барлык кыенлыкларны җиңәргә ярдәм итте. Шәкертләр шулай ук уку еллары турындагы тәэсирләре белән уртаклашып, үз хисләрен белдерделәр. Аларның һәркайсы үзләренең яраткан укытучыларын, күңелләрендә мәңгегә калачак кызыклы һәм күңелне нечкәртә торган мизгелләрне искә төшерде. Алар истәлекләрне кадерләп сакларга һәм киләчәк тормышта уңышка омтылырга вәгъдә иттеләр. Бу көн-балачак белән хушлашу гына түгел, ә яңа, олы һәм якты киләчәк белән очрашу да. Хәерле юлга, кадерле чыгарылыш укучылары!