Зәй районында авыл җирлекләре башлыкларының күчмә семинары узды

Бүген Түбән Биш авыл җирлегендә Зәй муниципаль районы авыл җирлекләре башлыкларының күчмә семинары узды. Семинар эшендә район башлыгы Разиф Кәримов, район Советы һәм Башкарма комитетының җаваплы хезмәткәрләре катнашты. Пленар өлешкә кадәр семинарда катнашучылар Куш –Елга авылында «Хәзрәт чишмәсе»н, республика программасы буенча З.Сәлимов урамында салынган асфальт юлны, күпфункцияле үзәк бинасын, Түбән Биш авылындагы янгын сүндерү постын карадылар, Пуст – Ашыт авылындагы ФАПта, Түбән Биш мәктәбендә булдылар, анда Р. Батулла музее, түгәрәкләрнең эше белән таныштылар. Авыл мәдәният йортында махсус хәрби операциядә катнашучыларга багышланган күргәзмәне карадылар, китапханәдә булдылар. Семинарның пленар өлеше мәдәният йортында узды. Кереш сүз белән семинарда катнашучыларга район башлыгы Разиф Кәримов мөрәҗәгать итте. Район башкарма комитеты җитәкчесенең икътисадый үсеш буенча урынбасары Марат Хәбибуллин 2024 елда авыл җирлекләре эшчәнлегенә бәя бирүгә анализ ясады. Түбән Биш авыл җирлеге җирле үзидарә органнарының 2024 елдагы эше һәм 2025 елга бурычлары турында җирлек башлыгы Алия Гыйльфанова чыгыш ясады. Авыл хуҗалыгы һәм азык-төлек идарәсе башлыгы Фәргать Камалиев авыл халкына кече хуҗалыклар буенча грант ярдәме турында сөйләде. Административ комиссиянең баш белгече Тәлгать Кашапов икеайлык чорында территорияләрне төзекләндерү эшләре турында сөйләде. Шулай ук контроль мәсьәләләр: 2025 елга гражданнардан үзара салым җыю, Түбән Биш авыл җирлегендәге оператив вәзгыять тә каралды. Район башлыгы Разиф Кәримов махсус хәрби оперциядә катнашучыларга гуманитар ярдәм әзерләүгә керткән өлешләре өчен рәхмәт белдерде, семинарда катнашучыларны барлык каралган мәсьәләләр буенча эшне активлаштырырга чакырды, авыл территорияләрен төзекләндерү буенча үз тәкъдимнәрен әйтте.