Сергей Чебнев: батырлыгы Россия тарихына мәңгегә язылган Зәй каһарманы

2025 елның 6 марты Зәй һәм бөтен Россия халкы өчен хәтер һәм горурлык көне булды. РФ Президенты Владимир Путин илнең иң югары бүләген — Россия Героеның «Алтын Йолдыз» орденын — Сергей Чебневның хатынына тапшырды, аның тормыш юлы һәм батырлыгы ватандашларының йөрәкләрендә мәңгегә калачак. Сергей үз гомере бәрабәренә йөзләгән хезмәттәшен коткара һәм Курск өлкәсендә дошманның алга баруын туктата. Сергей Чебнев 1979 елда Ольга һәм Владимир Чебневлар гаиләсендә туа. 1983 елда гаилә Зәй шәһәренә күчеп килә, анда кечкенә Сережа «Урман әкияте» балалар бакчасына йөри, аннары 2нче мәктәпкә бара. Тәрбиячесе Надежда Русанова аны әлегә кадәр яхшы һәм ярдәмчел малай буларак искә ала. «Минем туганнан туган энем Сергей минем өчен бертуганым кебек иде. Ул һәрвакыт елмая иде. Ул яхшы күңелле, гадел, дөреслек яратучан иде. Ул чыннан да үз иленең патриоты. Ул Зәйне бик ярата иде, кайткан чакларында без һәрвакыт шәһәр буйлап йөри идек. Форма аңа бик килешә иде. Мин абыем белән горурланам! Без аны юксыначакбыз”, - дип, истәлекләре белән уртаклаша аның туганнан туган сеңлесе, “Энергетик " мәдәният йорты директоры Светлана Ревина. Аның әнисе һәм Сергей Чебневның әтисе-бертуганнар. 1992 елда Чебневлар гаиләсе Яр Чаллыга күчеп килә. Сергей укуын 56 нчы мәктәптә дәвам итә, анда ул спорт белән: бокс, көрәш һәм команда уеннары белән мавыга. Аның характеры һәм физик әзерлеге булачак хәрби карьерасы өчен нигез була. Мәктәптән соң Сергей Казан югары хәрби танк училищесына укырга керә, анда булачак хатыны Ольга белән таныша. Гаиләдә ике бала— кызлары Евгения һәм уллары Игорь туа, ул әтисе эзләре буенча киткән һәм хәзер Калининград өлкәсендә хезмәт итә. Сергей махсус хәрби операциягә 2022 елның октябрендә китә. Өч айдан соң ул яралана, ләкин дәваланганнан соң яңадан фронтка кайта. Аның соңгы сугышы Курск өлкәсендә була, анда ул Кече Локня хатын-кызлар колониясен саклаучы батальон белән командалык итә. Үз гомере бәрабәренә Сергей дошманның Курск АЭСнә баруын туктата һәм 300 сугышчыны коткара. Аның батырлыгы илнең иң югары бүләге белән бәяләнде, аны Владимир Путин кулыннан хатыны Ольга алды. "Сергей чын патриот иде. Ул броне булуга карамастан, үзе теләп мобилизациягә китте. Ул үз илен якларга теләгән иде", - дип сөйли аның әнисе Ольга Чебнева. Сергейның балачак еллары үткән Зәй якташы белән горурлана. Аның исеме шәһәр һәм ил тарихына мәңгегә язылган. Сергей Чебнев-батырлык, тугрылык һәм Ватанга мәхәббәт үрнәге. Аның батырлыгы безгә чын каһарманнарның арабызда яшәвен, ә аларның исемнәре буыннар хәтерендә мәңгеләштерелергә тиешлеген искә төшерә. Фотолар vod-str.ru, kremlin.ru, nabchelny.ru сайтларыннан һәм Чебнёвларның гаилә архивыннан