Бәкедә коену буенча Роспотребнадзор киңәшләре

19 гыйнвардә Россиядә Качману христиан бәйрәме билгеләп үтелә. Күп кенә дин тотучылар өчен бу бәйрәм традицион чумылдыруга сәбәп булып тора. Суга чуму сулыкларда һәм махсус җиһазландырылган коену урыннарында башкарыла. Шул ук вакытта күпләр бу гамәлгә каршы күрсәтмәләр һәм аның сәламәтлек өчен тискәре йогынтысы турында уйламый. Салкында бәкедә коену хәтта нык һәм сәламәт организм өчен дә көчле стресс булып тора. Роспотребнадзор мондый чаралар уздыру вакытында саклык чаралары турында искә төшерә. Коенуны бары тик рәсми җиһазландырылган урыннарда гына уздырырга кирәк, анда куркынычсызлык кагыйдәләрен үтәүне коткару һәм медицина хезмәткәрләре күзәтә. Суга чумар алдыннан кан басымын үлчәргә һәм аның күрсәткечләренең нормада булуына инанырга кирәк. Бәкегә керер алдыннан саф һавада булырга һәм тирене салкын суга әзерләп җылытырга кирәк. Туңмас өчен суда бер минуттан да артык булмаска кирәк. Суга аяклар белән төшәргә кирәк. Бәкегә баш белән чуму баш мие кан тамырлары спазмы һәм аңны югалту белән яный. Купельдән чыкканда тоткаларга тотыныгыз яки тирә-юньдәгеләрнең ярдәменнән файдаланыгыз. Коенганнан соң сөлге белән сөртенеп, кибенегез, җылы кием киегез дә җылы урынга китегез. Алкоголь кабул итү катгый тыела, чөнки аның тәэсирендә кан тамырлары киңәя, һәм кеше тиз арада җылысын югалта, ә нерв системасында импульсларның тоткарлануы көчәя, бу исә хәрәкәтләрнең акрынаюына китерә. Шулай ук алкоголь йөрәккә йөкләнешне арттыра. Җылыну өчен иң яхшы чара-бал, имбир, әфлисун, лимон яки гөлҗимеш цедрасы кушылган кайнар чәй. Суга чумарга берничә сәгать кала организмны җылыту өчен ресурслар белән тәэмин итеп, әйбәтләп ашарга киңәш ителә. Бәкедә коену йөрәк-кан тамырлары, үзәк һәм периферик нерв системасы авырулары, сулыш юллары, ашказаны-эчәк тракты, сидек-җенес системасы авырулары, борын-йоткылыкның ялкынсыну авырулары, эндокрин авырулары булган кешеләргә ярамый. Балаларга, йөкле хатыннарга һәм өлкән яшьтәге кешеләргә бәкедә коену катгый тыела.