ТР Министрлар Кабинетында «Кече һәм урта эшмәкәрлек» илкүләм проектын гамәлгә ашыруга йомгак ясалды

Республика Вице-премьеры, икътисад министры Мидхәт Шаһиәхмәтов 15 гыйнварда ТР Министрлар Кабинетында узган брифингта «Кече һәм урта эшмәкәрлек» илкүләм проекты чаралары нәтиҗәсендә Татарстанда кече бизнесны үстерү һәм аңа ярдәм итүнең махсус институтларының бердәм системасы формалашуын билгеләп үтте. Илкүләм проектны гамәлгә ашыру чорында (2019 елдан алып 2024 елга кадәр) республиканың кече һәм урта бизнесына 316 млрд сумнан артык күләмдә 179 меңнән артык ярдәм чарасы тәкъдим ителде. Шулай ук үсеш институтлары төбәк эшмәкәрләренә 240 меңнән артык финанс булмаган ярдәм күрсәтте. «Моннан тыш, эшмәкәрлекне популярлаштыруга юнәлдерелгән махсус проектлар да гамәлгә ашырылды. Аерым алганда, 34 меңнән артык кеше белем алган мәктәп укучылары һәм студентлар өчен „Мәктәп бизнес-старты“ белем бирү программасы һәм бизнес булдыруга һәм үстерүгә юнәлдерелгән „Эшмәкәрлек фабрикасы“ проекты, аның чаралары 26 мең кешене колачлый», — дип хәбәр итте Мидхәт Шаһиәхмәтов. Икътисад министры ассызыклаганча, Россия Хөкүмәтенең комплекслы гамәлләре һәм Татарстан Республикасы Рәисе Рөстәм Миңнеханов карары нәтиҗәсендә бизнес өчен ярдәм чараларыннан файдалану мөмкинлеге сизелерлек киңәйтелде. Монда федераль һәм төбәк чараларын берләштергән һәм эшмәкәрләрнең онлайн-форматта үсеш институтлары белән элемтәсен тәэмин иткән МСП. РФ цифрлы платформасы мөһим роль уйнады. Шулай ук «Кече һәм урта эшмәкәрлек» илкүләм проекты кысаларында аерым сәнәгать парклары инфраструктурасы булдырылды. Болар — «Теләче» сәнәгать паркы, «Саба» һәм «Химград» индустриаль парклары. Төзелгән инфраструктура кече бизнеска җитештерү мәйданнарына һәм биналарга керү мөмкинлеген тәэмин итте. Спикер сүзләренчә, илкүләм проектны нәтиҗәле гамәлгә ашыруны республикада МСП үсеше темплары да раслый, бу Россия Президенты Владимир Путин билгеләгән максатларга туры килә. Министр шулай ук «Кече һәм урта эшмәкәрлек» илкүләм проектының үзмәшгульлек институтын үстерүдә мөһим ролен ассызыклады. Татарстан, сынау төбәге буларак, 2019 елдан башлап экспериментны гамәлгә ашыруда актив катнаша. Бүген республикада 357 меңнән артык үзмәшгуль исәпләнә, аларның гомуми кереме 200 млрд сумга якын, ә бюджетка түләнгән салым 8 млрд сум тәшкил итә. Министр хәбәр иткәнчә, бизнеска ярдәм чаралары агымдагы елда да сакланачак, аларны гамәлгә ашыру «Нәтиҗәле һәм конкурентлы икътисад» илкүләм проекты кысаларында дәвам итәчәк.