Зәйдә физкультурачылар көнен билгеләп үттеләр

Бүген Зәй шәһәренең «Энергия» стадионында илнең төп спорт бәйрәме – физкультурачылар көне узды. Бәйрәм гадәттәгечә бөтен ил буйлап августның икенче шимбәсендә «Спорт – тормыш нормасы» федераль проектын «Демография»милли проектын гамәлгә ашыру кысаларында үткәрелә. Ачылу тантанасында Зәй муниципаль районының финанс-бюджет палатасы Рәисе Байрашев Павел Андреевич, Зәй муниципаль районы башлыгы ярдәмчесе, Россиянең атказанган тренеры Фәйзуллин Рәкыйп Нәҗип улы, район Башкарма комитеты җитәкчесенең социаль мәсьәләләр буенча урынбасары Ревина Светлана Юрьевна, көрәш буенча ике тапкыр дөнья чемпионаты җиңүчесе, көрәш буенча 2024 елгы БРИКС уеннары чемпионы, тугыз тапкыр батыр калган Зәй Сабантуе батыры – Сәлахов Радик Сирень улы, Зәй муниципаль районының физик культура, спорт һәм туризм идарәсе җитәкчесе вазыйфаларын башкаручы - Тимеркаева Илзирә Габделбәр кызы катнашты. Физик культураны һәм спортны үстерүгә һәм популярлаштыруга керткән өлешләре өчен спорт учреждениеләре хезмәткәрләре һәм физкультура хәрәкәте активистлары ТР Спорт министрлыгының ведомство бүләкләре, башлыкның, Башкарма комитет һәм физик культура, спорт һәм туризм идарәсе җитәкчесенең Рәхмәт хатлары белән бүләкләнделәр. Спортчыларга «спорт мастерына кандидат» һәм «беренче спорт разряды» билгеләре, шулай ук «ГТО»Бөтенроссия физкультура-спорт комплексының алтын билгеләре тапшырылды. Гаилә елы кысаларында авыл спортын үстерүгә, сәламәт яшәү рәвешен һәм гаилә кыйммәтләрен пропагандалауга керткән өлешләре өчен Сәвәләй авылыннан Петровлар гаиләсе муниципаль район башлыгының Рәхмәт хаты белән бүләкләнде. Аларның балалары муниципаль һәм республика ярышларында актив катнашалар. "Физкультурачылар көне-илебезнең барлык физкультура һәм спорт җәмәгатьчелегенең мөһим һәм әһәмиятле бәйрәме, һәм ул безнең гаилә өчен үзенчәлекле. Спорт белән мавыгу гаиләбезне берләштерә, аны дус һәм нык итә. Бездә төрле яшьтәге һәм физик мөмкинлекләр булган кешеләр өчен бик күп төрле спорт чаралары һәм ярышлар уздырылуы сөендерә. Безнең гаилә девизы болай яңгырый: "Кечкенә җиңү – намуслы хезмәт, зур җиңү – кечкенә җиңүләр җыелмасы!."Физкультурачылар көне белән, барыгызга да яңа спорт үрләре!"- дип билгеләп үтте Алексей Ильич һәм Лидия Гавриловнаның улы, районның волейбол буенча җыелма командасы әгъзасы Владимир Петров. Бәйрәмдә Зәй мәктәпләрендә тәрбияләнүчеләрнең киокусинкай, көрәш, нәфис гимнастика, баскетбол, футбол, хоккей буенча күнегүләр һәм күрсәтмә чыгышлар оештырылды. Теләге булганнар ГТО нормативларын һәм гаилә эстафетасын тапшыруда, йога һәм сәламәтләндерү гимнастикасы дәресләрендә көчләрен сынап карадылар. Стадионның спорт мәйданчыкларында ветераннар арасында мини-футбол, шахмат һәм шашка, пляж волейболы һәм җиңел атлетика буенча ярышлар узды.