Зәйдә һәлак булган хәрбине соңгы юлга озаттылар
Бүген зәйлеләр 38 яшьлек В.И.Чулков белән хушлашты. Рядовой Донецк һәм Луганск халык республикалары территориясендә хәрби бурычны үтәү барышында һәлак булган. Матәм чарасы “Энергетик” мәдәният сараенда узды. Татарстан Республикасы Президенты Рөстәм Миңнеханов исеменнән һәм шәхсән үз исеменнән хатыны, кызлары, туганнары һәм якыннарының кайгысын уртаклашу сүзләре белән район башлыгы Р.Г. Кәримов мөрәҗәгать итте. "Инде өченче ел безнең ил махсус хәрби операция шартларында яши. Илнең барлык төбәкләреннән россиялеләр, шул исәптән Зәй халкы да, махсус хәрби операциянең беренче көннәреннән үк бердәмлек күрсәттеләр һәм Ватанны яклауга иңгә-иң куеп бастылар. Меңнәрчә ир-атлар, беренче чакыруны алуга ук кыюлык һәм ихтыяр көче күрсәтеп, Ватан мәнфәгатьләрен якларга киттеләр, һәм бүген алдынгы линиядә көрәшәләр. Шундый батыр сугышчылар аркасында без барыбыз да тыныч күк астында яшибез.
Владимир Игоревич - чын ир-ат, соңгы сулышына кадәр хәрби антына тугры калган, үз иленең чикләрен яклауга бәяләп бетергесез өлеш керткән һәм үз тормышын тыныч күк йөзе өчен биргән батыр егет. Хөрмәтле Лариса Семеновна, Виктория, Валерия, туганнары һәм якыннары! Олы югалтуыгыз уңаеннан, ихлас күңелдән кайгыгызны уртаклашам! Без барыбыз да сезнең белән бергә кайгырабыз. Аны югалту кайгысын бернинди сүзләр дә оныттырмый. Без Владимир Игоревич белән горурланабыз һәм аның турында хәтерне мәңгегә сакларбыз”, - диде Разиф Галиевич.
Шулай ук җыелучылар алдында кайгы уртаклашу сүзләре белән, республика Хөкүмәтеннән куратор Иван Гущин, Зәй шәһәре һәм Зәй районы хәрби комиссары Айрат Әгъләмҗанов чыгыш ясадылар. Сугыш бурычын үтәгәндә күрсәткән батырлыгы һәм фидакарьлеге өчен Россия Федерациясе Президенты Указы белән рядовой Чулков үлгәннән соң "Батырлык" ордены белән бүләкләнде. Владимир Игоревичны соңгы юлга бөтен хәрби тәртипләрне үтәп озаттылар, бер минутлык тынлык белән искә алдылар.