Район башлыгы Икътисади советның чираттагы утырышын үткәрде

Бүген хакимият бинасының кече залында район башлыгы Разиф Кәримов Икътисади советның чираттагы утырышын уздырды. Көн тәртибенә түбәндәге сорау куелды: «Татарстан Республикасы армиясенә, авиациясенә һәм флотына ярдәм итү ирекле җәмгыяте» төбәк иҗтимагый - дәүләт берләшмәсенең Зәй җирле оешмасының 2023 елның 9 аенда эшчәнлеге нәтиҗәләре һәм 2024 елга перспективалы планнар турында». Төп доклад белән Совет рәисе Николай Глухов чыгыш ясады. Аның сүзләренчә, 2023 ел Зәй җирле оешмасы өчен, алдагылары кебек үк, заманча кулланучылар базарында алга таба эшләү ягыннан мөһим. Зәй оешмасына 1978 елда нигез салынган. Төп бурычлары булып оборона - массакүләм, хәрби - патриотик эш, техник һәм хәрби – гамәли спорт төрләрен үстерү, массакүләм - техник һөнәрләр кадрларын әзерләү, гражданнарны хәрби - хисап белгечлекләре буенча әзерләү тора. Быел «А» категорияле машина йөртүчеләрне (мотоциклчыларны) һөнәри әзерләү буенча яңа категория ачыла, моның өчен яңа мотоцикл сатып алынган. Шулай ук 2023 елда уку процессы өчен 3 автомобиль: 2 ЛАДА Гранта һәм Форд Фокус сатып алынган. Уставка ярашлы, оешма ел саен хәрби хезмәткә чакырылуга кадәрге яшьләр белән спорт - массакүләм һәм хәрби - патриотик юнәлештәге чаралар үткәрү белән шөгыльләнә. 2023 елда 33 спорт - массакүләм һәм хәрби - патриотик чара уздырылган, аларда 1225 кеше катнашкан. Киләсе елда шәһәрдә балалар һәм яшүсмерләр өчен картинг секциясен эшләтеп җибәрергә җыеналар. Татарстан Республикасы Икътисад министрлыгы грантын отканнар һәм шуның исәбенә балалар һәм өлкәннәр өчен 2 картинг сатып алынган. Оешманың кереме автотранспорт чаралары йөртүчеләрен әзерләүдән формалаша. Төп докладтан соң катнашучылар фикер алышты. Йомгаклау сүзе белән район башлыгы Разиф Кәримов чыгыш ясады. Ул коллективка алга таба нәтиҗәле эш теләде, оешма хезмәткәрләренең хезмәт хакын арттыру буенча үз тәкъдимнәрен бирде.