Зәйле - кул эшләре остасы

Бүген «Безнең кешеләр, Зәй» рубрикасында без бөтен гомерен автомобиль юллары төзүгә һәм аларны карап тотуга багышлаган гаҗәеп кеше турында сөйләргә телибез. Бу - «Татнефтедор» ҖЧҖ Зәй идарәсенең иң яхшы хезмәткәрләренең берсе Әгъләмов Рәшит Габдулла улы. Тумышы белән ул Нурлат районының Яңа Әмзә авылыннан. Тәтеш совхоз-техникумында урта техник белем ала. Армиядә автомобиль гаскәрләрендә хезмәт итеп, туган авылына кайта, анда төзелеш бригадасы булдыра, колхоз хезмәткәрләре өчен йортлар төзи. Үзен дәүләт иминиятенең өлкән инспекторы итеп тә сынап карый, 13 авыл җирлегенә хезмәт күрсәтә. 1986 елда Рәшит Габдулла улы абыйсы чакыруы буенча гаиләсе белән Зәй шәһәренә күченә. Биредә 13 ел авыл хуҗалыгы техникасы оешмасында төзелеш бригадасы бригадиры булып эшли, аның хезмәткәрләре өчен йортлар төзи. Соңрак аны нормалаучы-механик итеп оешманың автогаражына күчерәләр. Инициативалы механикны Зәй автомобиль юллары идарәсенә чакыралар. Тырышлыгы, белеме һәм үҗәтлеге аңа кыска вакыт эчендә башта автомобиль техникасының техник торышы контролеры, аннары ремонт-механика остаханәсе механигы булырга мөмкинлек бирә. Монда ул бик күп рациональ тәкъдимнәр кертә һәм һәрвакыт үзенең белеме һәм бай тәҗрибәсе белән яшь хезмәткәрләр белән теләп уртаклаша. 2022 елда асфальт-бетон цехының битум пешерүчесе итеп күчерелә, бүгенге көнгә кадәр шунда эшли. Аның фидакарь хезмәте югары ведомство һәм дәүләт бүләкләре белән билгеләнә: "ТаграС-Холдинг" ҖЧҖ генераль директорының Рәхмәте, ТР Транспорт һәм юл хуҗалыгы министрының Рәхмәте; Россия Федерациясе транспорт министрының Рәхмәте. Рәшит Габдулловичның яраткан хоббилары да бар: ул күп еллар умартачылык белән шөгыльләнә, буш вакытларында тимердән эшләнмәләр ясый. Рәшит Әгъләмов-һәрнәрсәгә оста. Аның шәхси девизы: «Һәр көн-яңа мөмкинлек», ә хезмәттәшләренә һәрвакыт: «Сыйфатлы эш, сыйфатлы юллар», - дип әйтә. Хатыны Фатыйма Солтановна белән 40 елга якын бәхетле никахта яшиләр, кыз үстергәннәр. #Марафон Хезмәте #Хезмәт Кешеләренә