Зәй делегациясе - авыл хуҗалыгы хезмәткәрләре көненә багышланган тантаналы чарада

Бүген «Казан Экспо» Халыкара күргәзмәләр үзәгендә авыл хуҗалыгы һәм эшкәртү сәнәгате хезмәткәрләре көненә багышланган тантаналы чара узды. Чарада Татарстан Республикасы Рәисе Рөстәм Миңнеханов, ТР Дәүләт Киңәшчесе Минтимер Шәймиев, министрлыклар һәм ведомстволар вәкилләре, тармак ветераннары, авыл хезмәтчәннәре һәм авыл хуҗалыгы предприятиеләре вәкилләре катнашты. Район башлыгы Р.Г. Кәримов җитәкчелегендәге Зәй делегациясе составында - районның авыл хуҗалыгы һәм азык-төлек идарәсе башлыгы һәм белгечләре, «Агросила» АҖ генераль директорының «Агросила-Сервис» АҖ эшчәнлеге мәсьәләләре буенча урынбасары, «Зәй шикәре» АҖнең транспорт, чимал әзерләү һәм склад хуҗалыгы буенча җитәкчесе, «Аксар», «Чыбыклы», «Кадер», «Сәвәләй» җитештерү комплеклары җитәкчеләре һәм башкалар. Татарстан Рәисе Рөстәм Миңнеханов, ТР Премьер-министры урынбасары - ТР авыл хуҗалыгы һәм азык-төлек министры Марат Җәббаров кунакларны һөнәри бәйрәмнәре белән котладылар һәм бүләкләү тантанасын үткәрделәр. Бүләкләнүчеләр арасында безнең район вәкиле дә булуы сөендерә. “Зәй шикәре” агрофирмасының әйдәп баручы инженер-механигы Сәхапов Мидхәт Җәмил улына «Россия Федерациясенең атказанган авыл хуҗалыгы хезмәткәре» дигән мактаулы исем бирелде. Югары дәүләт бүләген аңа Рөстәм Нургали улы Миңнеханов тапшырды. Лаеклы бүләк белән котлыйбыз һәм алга таба да уңышлар телибез!