Район башлыгы Белем көненә багышланган тантаналы линейкаларда катнашты

Бүген Зәй муниципаль районының барлык мәгариф оешмаларында белем көненә-1 сентябрьгә багышланган тантаналы линейкалар уза. Белем иленә беренче адымнарны Зәйдә 530 беренче сыйныф укучысы ясады. Р.Ш.Фәрдиев исемендәге Татар гимназиясендә чара район башлыгы Разиф Гали улы Кәримов, Татарстан Республикасының мәдәни мирас объектларын саклау комитеты рәисе урынбасары Марсель Мәхсүм улы Вәлиуллин, Зәй шәһәр прокуроры Урванцев Сергей Александрович, мәгариф идарәсе башлыгы Эрнст Рәис улы Сәфәргалиев катнашында узды. Кунаклар балаларга сәламәтлек, уңышлар һәм яңа биеклекләргә ирешүләрен теләделәр. Белем көнен Зәй политехник көллияте студентлары да билгеләп үтте. Бәйрәм хөрмәтенә тантаналы линейка беренче курс студентлары өчен район башлыгы Разиф Кәримов, шәһәрнең эре предприятиеләре һәм оешмалары җитәкчеләре катнашында узды. Разиф Гали улы студентларны уку елы башлану белән котлады, аларга үз тармагында чын профессионал булырга, ата - аналарга балаларының уңышларын күрүләрен теләде. Район башлыгы шулай ук педагогларга студентларны тәрбияләүгә һәм укытуга керткән хезмәтләре, тырышлыклары һәм белемнәре өчен рәхмәт сүзләрен җиткерде. Быел колледжда 9 белгечлек буенча 538 студент белем алачак, шуларның 171е-беренче курс студентлары.