Зәйдә эш визиты белән Татарстан Республикасы Рәисе Рөстәм Миңнеханов булды

Бүген Татарстан Республикасы Рәисе Рөстәм Миңнеханов эш визиты белән Зәйгә килде. Иң беренчеләрдән булып шәһәр ипподромында район активы һәм аграрийлар белән очрашу узды. Район башлыгы Разиф Кәримов Рөстәм Миңнехановка бер гектардан 26 центнер уңыш белән бөртекле культураларны җыеп алуның тәмамлануы турында хәбәр итте, җыелган ашлык районда 93,5 мең тонна тәшкил итте. Чәчү батыры Айнур Шәйхиев һәм урак батыры Ирек Хәсәншин район аграрийлары исеменнән Рөстәм Миңнехановка “2023 ел- символик уңыш икмәге”н тапшырдылар. Бүген район шикәр чөгендерен җыюга кереште. Район кырларында көзге культуралар чәчү һәм минераль ашламалар кертеп туфрак эшкәртү дәвам итә. Рөстәм Миңнеханов районда үсемлекчелек үсешен югары бәяләде. "Гомумән алганда, район бик оешкан, хәл тотрыклы, җитәкче тәҗрибәле. Үсемлекчелек һәм урып-җыю буенча сезнең күрсәткечләрегез югары. Быелгы ел өчен гектардан 26 центнер уңыш алу - бу бик яхшы", - диде Рөстәм Нургалиевич. Актив белән очрашканнан соң, Татарстан Республикасы Рәисе капиталь төзекләндерелгән Р.Ш. Фәрдиев исемендәге татар гимназиясен карады. Район башлыгы белән бергә алар китапханә, актлар залы, ашханә, уку кабинетлары, спорт һәм хореография залларында булдылар. Монда төзүчеләр инженерлык челтәрләрен, фасад элементларын, урам коймаларын, янгынга каршы баскычларны, уку йортының ишекләрен һәм тәрәзәләрен алыштырдылар, түбәсен җылыттылар, гимназия янәшәсендәге мәйданчыкны төзекләндерделәр. Рөстәм Нургали улы күргәннәреннән канәгать калды, укытучылар һәм балалар белән аралашканда аларны яңартылган уку бинасына сакчыл карарга чакырды. Беренче сентябрьдә татар гимназиясе 357 укучыны кабул итәчәк. Рөстәм Нургали улы шулай ук икенче объект -«Дулкын - Волна» бассейнын ачуда катнашты, әзерлек дәресләре залын, киенү бүлмәләрен, 50 тамашачыга исәпләнгән балконны, балалар бассейнын һәм өлкәннәр өчен 6 рәтле бассейнны карады. Чарада катнашучы кунакларга "Зәй" спорт мәктәбендә шөгыльләнүчеләрнең күрсәтмә чыгышы тәкъдим ителде. Район Башкарма комитеты җитәкчесе Эмиль Галиев йөзү күнекмәләренә ия булган мәктәпкәчә һәм мәктәп яшендәге балаларны җәлеп итеп тормышка ашырылачак «Йөзү буенча гомуми белем бирү» программасы турында сөйләде. Рөстәм Миңнеханов республикада кешеләрне физик культура белән шөгыльләнүгә тарту өчен күп эш башкарылуын, күп заманча спорт инфраструктуралары төзелүен билгеләп үтте. Сәфәре азагында Татарстан Рәисе шушы көннәрдә генә бер гасырлык туган көнен билгеләп үткән, Зәй ГРЭС ын төзүдә башлап йөргән Леонид Мачтаков белән очрашты. Рөстәм Нургали улы Леонид Яковлевичны 100 яшьлек юбилее белән котлады, аңа актив тормыш позициясе өчен рәхмәт белдерде, шулай ук Россия вице-премьеры Александр Новак исеменнән котлау сүзләрен дә җиткерде. "Сез Зәй районының гына түгел, бөтен республиканың горурлыгы. Сезне чын күңелдән юбилеегыз белән котлыйм һәм нык сәламәтлек телим», - диде Рөстәм Миңнеханов, ветеранга Татарстан Республикасы Рәисе Рәхмәт хатын һәм кыйммәтле бүләк тапшырды.