Зәйдә «Милли мәдәниятләр фестивале» танып-белү программасы узды

18 августта "Энергетик" мәдәният йортында "Милли мәдәниятләр фестивале" танып-белү программасы үткәрелде, анда Россиядә һәм Татарстан Республикасында яшәүче халыкларның милли киемнәре турында сөйләделәр. Чарада рус, татар, мари халкының милли киемнәреннән киенгән "Кояшкай", "Тиремкәй", "Якты кондыз" балалар бакчаларында тәрбияләнүчеләр катнашты. Шулай ук балалар керәшен татарларының уеннары, җырлары белән беррәттән, әрмән телендә шигырьләр тыңладылар. Чараны "Легенда" хореография ансамбле балалары ачты, Әминә Хөснетдинова "Нон япаман" хорезм биюен бик оста итеп башкарды, шулай ук Виктория Анашкина мари телендә җыр белән шатландырды. Балалар истәлекле бүләкләр һәм яңа онытылмаслык тәэсирләр алдылар!