Зәйдә кыска вакытлы ялга кайткан хәрби хезмәткәрләр белән очрашу булды

Бүген "Энергетик" мәдәният сараенда район башлыгы Р.Г. Кәримовның кыска вакытлы ялга кайткан хәрби хезмәткәрләр – махсус хәрби операциядә катнашучылар белән чираттагы очрашуы булды. Очрашуда мобилизацияләнгән хәрбиләрнең гаиләләренә ярдәм мәсьәләләре буенча эшче төркем әгъзалары, Зәй шәһәре һәм Зәй районы хәрби комиссариаты вәкилләре, активистлар һәм волонтерлар, иҗтимагый берләшмәләр әгъзалары катнашты. Бер минут тынлык белән очрашуда катнашучылар махсус хәрби операция зонасында һәлак булган якташларын искә алдылар. Район башлыгы Разиф Кәримов хәрбиләргә районда башкарылучы эшләр турында сөйләде, барлык зәйлеләр исеменнән солдатларга Ватан мәнфәгатьләрен яклаган өчен рәхмәт белдерде, көч җыеп китүләрен һәм җиңү белән кире әйләнеп кайтуларын теләде. Шулай ук Разиф Гали улы гуманитар ярдәмнең чираттагы партиясе әзерләнүен хәбәр итте. Чәй табынында сугышчылар үз хезмәтләре турында сөйләделәр, гуманитар ярдәм күрсәтүләре, якыннары турында кайгыртулары өчен барлык зәйлеләргә зур рәхмәт белдерделәр. Хәрбиләр җитәкчелеккә үзләрен кызыксындырган сорауларын бирде, көнүзәк проблемалар буенча фикер алыштылар. Соңыннан хәрбиләргә район хакимияте исеменнән бүләкләр тапшырылды.