Зәйлеләр Җөридә 25 нче Питрау бәйрәмендә катнашты

"Питрау"- керәшеннәрнең мөһим йола бәйрәмнәренең берсе. Ул җәйнең иң югары ноктасына туры килә һәм яңа календарь циклына күчүне гәүдәләндерә. Питраудан соң күпләп сабанга чыгалар. Питрау көненә кадәр генә дару үләннәре һәм чәчәкләр җыялар. Питраудан соң күке кычкырмый, сандугач сайрамый. Сулыкларда су "чәчәк ата", яшьләр уеннары тәмамлана. Кояшның беренче нурларын каршылау, төнге учак янында күмәк әйләнү бәйрәмгә кабатланмас колорит бирә. 15 июльдә Мамадыш районы Җөри авылы Тырлау аланында керәшеннәрнең 25 нче юбилей «Питрау» республика бәйрәме узды. Бәйрәмнең мәртәбәле кунаклары: ТР Дәүләт Советы Рәисе, Татарстан халыклары Ассамблеясе Рәисе Фәрит Мөхәммәтшин, ТР керәшен җәмгыяте рәисе, ТР Дәүләт Советы депутаты, «Ак Барс «холдинг компаниясе» АҖ генераль директоры Иван Егоров, ТР керәшен җәмгыяте башкарма комитеты җитәкчесе, Яков Емельянов исемендәге мәдәни үзәк директоры Людмила Белоусова һәм башкалар булды. Зәй делегациясен район башлыгы урынбасары Петр Уразайкин җитәкләде. Бәйрәмдә төрле мәйданчыклар эше оештырылды, һәркем үзенә ошаган мәйданчык таба алды: “Тырлау” Җөри ярминкәсе, “Түгәрәк уен”, “Айбагыр” балалар мәйданчыгы, “Туганайлар” керәшен ишегаллары, “Димче” танышу аланы, майданда уеннар, “Тәбикмәк” керәшен сыйлары, учак янында “Арулану” уеннары һәм башкалар. Бәйрәмнең аерылгысыз өлеше булып «Чаптар» ат чабышлары һәм көрәш тора. Иң матур, эрудицияле һәм милли гүзәлне сайларга ярдәм иткән «Питрау чибәре» конкурсы бәйрәмнең үзенчәлеге булды. Концерт программасы белән татар эстрадасы йолдызлары: Салават Фәтхетдинов, Вадим Захаров, Виталий Агапов, Марина Карпова, «Бәрмәнчек» ансамбле һәм башкалар чыгыш ясады. Зәй районын бәйрәмдә керәшен ишегалдын әзерләгән "Җиләк " фольклор ансамбле тәкъдим итте. Фәрит Мөхәммәтшин кулыннан «Җиләк» ансамбле җитәкчесе Ольга Агашкина милли костюмнар тегүгә 500 000 сумлык сертификат алды. Бәйрәм «Питрау учагы» тирәсендә традицион «Дуслык» әйлән- бәйләне белән тәмамланды.