Зәй районында "Питрау" керәшен мәдәнияте бәйрәме узды
Бүген зәйлеләр һәм районыбыз кунаклары Баграж авыл җирлегенең Кашкатау итәгенә традицион Питрау бәйрәменә җыелды. Бәйрәм "Нәсел тамырлары" театральләштерелгән тамашасыннан башланды. Тантаналы ачылышта зәйлеләрне һәм район кунакларын район башлыгы Разиф Кәримов сәламләде. Разиф Гали улы барысын да бәйрәм белән котлады, нәтиҗәле хезмәте, район үсешенә һәм хәрбиләргә гуманитар ярдәм җыюга керткән өлеше өчен керәшен җәмәгатьчелегенә рәхмәт сүзләрен җиткерде, барлык мобилизацияләнгәннәрнең туган районнарына якыннары һәм туганнары янына исән-имин кайтуларын теләде.
Питрау бәйрәмендә өлкән буын кешеләрен-юбилярларны, яңа туган балаларны, яңа гына өйләнешкән һәм озак гомер кичергән парларны котлау традициясе яши. Быел истәлекле бүләкләр 90 яшьлек Мартемьянов Кузьма Владимировичка, 50 ел бергә гомер иткән Анна Васильевна һәм Григорий Владимирович Григорьевлар гаиләсенә, яшь пар Альберт Романов һәм Ангелина Кузьминага, 2 июль көнне кызлары Миләүшә туган Илдар һәм Юлинә Фәтхуллиннар гаиләсенә тапшырылды.
Бүләкләү тантанасында көрәш буенча дөнья беренчелеге җиңүчесе Ибраһимов Җәмилгә Зәй муниципаль районы башлыгының Мактау грамотасы, аның тренеры Минһаҗев Айратка - Татарстан Республикасы Рәисе Рәхмәте тапшырылды. Район башлыгының Рәхмәт хатлары белән спортчының әти-әнисе Фәнис Әлфәт улы һәм Хәлидә Хәлит кызы бүләкләнде.
Бу кичне Кашкатау итәге юмарт бүләкләр, яңгыравыклы җырлар һәм дәртле биюләр ярминкәсе булды. Авыл җирлекләре милли ишегаллары бизәде, анда ата-бабаларның традицияләре генә түгел, ә хәзерге заман мәдәнияте, Зәй осталарының уникаль эшләнмәләре дә тәкъдим ителде. Төрле мәйданчыклар үз эшләрен алып барды, анда һәркем үзенә ошаган шөгыль таба алды. Актив ял яратучылар халык уеннарында һәм конкурсларында, спорт ярышларында катнаштылар. Кунакларда бигрәк тә Яучы шалашы, агачтан юнып фигуралар ясау буенча мастер-класс, «Питрау чибәре-2023», «Ак дәдәй», «Моңлы тавыш 60+» конкурслары кызыксыну уятты. Питрау чибәре исемен Кабан-Бастрык авылыннан Алеся Димитриева яулады. Ә Чабаксар осталары тарафыннан юнып ясалган бүре, аю, пантера һәм башка хайван фигуралары районга истәлеккә калды.
Бәйрәм кунакларын үзләренең иҗади номерлары белән татар эстрадасы артистлары - Ясмин, «Бәллүр» триосы, Марина Карпова, «Агидел» дәүләт җыр һәм бию ансамбле, ТР районнарының керәшен коллективлары сөендерде. Спорт мәйданчыкларында уеннар һәм ярышлар, көрәш, армспорт, гер күтәрү узды. Моннан тыш, теләгән һәркем милли уеннарда һәм төрле конкурсларда катнаша алды. Балалар мәйданчыгында мәгариф идарәсе тырышлыгы белән керәшен җырының балалар вокаль конкурсы оештырылды. Питрау традицион бәйрәм учагы белән тәмамланды.
Бәйрәмдә Татарстан Республикасы Хөкүмәте кураторы Иван Гущин, Татарстан Республикасы Дәүләт Советы депутатлары Илшат Әминов, Николай Нефедов, республика керәшеннәре иҗтимагый оешмасы башкарма комитеты җитәкчесе Людмила Белоусова һәм башка мәртәбәле кунаклар катнашты.